Germany hnena sai 20,000 pekah vau

Botswana president chuan politics thila inhnialna kal zelah Germany hnenah sai 20,000 vel thawnah a vau.
Kumin kumtir lam khan Germany environment ministry chuan hunting trophy chawkluhna lamah khauh zawka hmalakna kalpui tur a ti a.
Botswana president Mokgweetsi Masisi chuan German media te hnenah German sorkar hmalakna chuan Botswanans te rethei zawkin a siam dawn a ni a ti.
Humhimna lama hmalakna avangin sai te chu an pung nasa lutuk tawh tia sawiin sai pel chu an tam lutuk tur venna \ha ber a ti bawk a.
Germans te hian min hrilh dan ang hian sai te nen hian cheng ho ta che u tiin Masisi chuan german newspaper Bild ten an kawmnaah a sawi a.
Botswana chu khawvel puma sai hmun thuma \hena hmun khat 130,000 vel lai awmna a ni a.
Sai rual te chuan property te tichhiain thlai te an tichhe nasa a, mihring tihhlum pawh an nei nual niin Bild hnenah a sawi.
Botswana hian a hma pawhin Angola hnenah sai 8,000 a lo pe tawh a, Mozambique hnenah za chuang a pe tawh bawk a, chungte chu sai tam lutuk an tihtlemna kalzel a ni.
“Germany hnenah thil pek kan duh a ni” tiin Masisi chuan sawiin a thusawi chu fiamthu a nih loh thu leh kan duh lo tia chhan a rem dawn lo a ti zui bawk.
Botswana hian trophy hunting kum 2014 khan a khap a, mahse, tualchhung mi te nawrna nasa tak karah kum 2019 khan a hlip leh a ni.
Kum tinin Botswana chuan hunting quota tichhuakin chu chu local community tena sum lakluh nana an hman ber pakhat a ni bawk.
Germany chu EU ram zinga African elephant trophy leh hunting trophy hrim hrim chawlut hnem ber niin Humane Society International te chuan an tarlang.
German environment ministry thupuangtu chuan he mi chungchang hi Botswana chuan Germany hnenah engmah sawi emaw hriattirna a la siam lo a ti thung a.
“Biological diversity hlohna kalzelah hunting trophy kan chawkluh te chu dan ang thlap leh sustainable ni se kan ti a ni” tiin a sawi a.
Ministry chuan African ram te nen import rules chungchangah inbiakna an neih mek thu sawiin chung zingah chuan Botswana pawh a tel tiin a sawi bawk.
Australia, France leh Belgium te chuan hunting trophy trade an lo khap tawh thung a. UK MP te pawhin khap a nih nan remtihna an pe tawh bawk a, dan erawh a la ni lo thung.