Centre-a pawl hnih awmah khawi lamah mah kan tel lo – Lalduhoma

Centre-a pawl hnih lian pui pui awmah a khawi lamah mah an tang dawn lo tih ZPM hruaitu, chief minister Lalduhoma chuan a sawi.
Nilaini zana Thenzawla an party mite nen an inkawmnaah Serchhip bialtu MLA Lalduhoma chuan, central-ah zawm emaw do emaw an nei dawn loa, a pawng a puia central sawrkar an do loh tur thu sawiin, “Thlawp theihna leh puihna awm chin zawng zawngah kan thlawp dawn a, ram leh sakhaw tana him lo chinah erawh huaisen takin kan dodal dawn. Tun thla 4 chhung sawrkar kan kalpui tawhah cheng vaibelchhe engemawzat kan hmu tawh a, central-a sawrkarna chelhtute pawl zu nih kher emaw lehlam pawl nih kher emaw a tul lo. Pawl hnih lian pui pui awm mekah a khawi lamah mah kan tang dawn loa, ram leh sakhaw tana pawi thei an tih dawna dodal thei tura zalen taka awm a tha ber,” a ti.
Lunglei Municipal Council leh Aizawl Municipal Corporation bakah ZPM MLA bial 27-ah MP inthlana vote hmu sang ber bial neitute hnenah lawmman an pe dawn ZPM hruaitu hian sawiin, MLA zingah Serchhip bialin lawmman pakhatna la thei tura theihtawp chhuah turin a sawm. MLA inthlan dawn laia pukchawpa campaign tur an tihte kha an la ni reng a, an hausa chuang lo tih sawiin, ruling nih avanga nuamsaa campaign thei an awm lo tih a sawi. An party mi leh sate chu MLA thlan lai ang bawka thahnemngai taka tan la turin a chah bawk.