Zirlai te an vote neihnaa haw phal dawn

April 19-a Mizorama Lok Sabha inthlanpui neih turah college zirlaite chu an vote neihna, an khuaa haw phalsak an ni dawn a, vote an thlak ngei tih finfiahna erawh neih a ngai dawn.
MP thlan huna vote tla a that theih dan tur ngaihtuahin chief electoral officer Mizoram Madhup Vyas hoin Ningani khan a kaihhnawih sawrkar hotute an thukhawm a. CEO chuan India ram inthlanpui hi khawvelin a ngaichangin a thlir thup dawn tih sawiin, “Khawvela democracy ram lian ber kan nih ang ngeiin khawvel mithmuhah entawntlaka kan awm a ngai a, hemi atana pawimawh chu mipui vote tla a that a ni,” a ti. A tlem berah MP inthlan hmasa aia zaa 5 tala vote tla a pun theihnan theihtawp chhuaha tan tlan a ngai tih a sawi.
Kar kalta lama hemi chungchang sawiho tuma hmalak dan tur relte bawhzui a nih dan report a ni a. Higher & Technical Education department chuan Mizorama sawrkar leh private college zawng zawngah lehkha an pechhuak tawh a, a chhanna pawh an dawng tawh tih an sawi. Zirlai zingah an khaw lama vote thlak tura haw ngaite tan chawlh pek an ni dawn a, an attendance-in a tuar dawn lo. Vote an thlak ngei a ni tih finfiahna awm ngei se a tha tih sawi a ni a. College tinin an hmalakna report hi CEO office-ah thawn tur a ni tih sawi a ni bawk.
School Education department chuan zirna in zawng zawngah thupek an chhuah a. Zirlai vote la neilote pawh inthlanpui pawimawh zia hrilhfiah a, an chhungte zinga vote neiten an thlak ngei theihnan hmanraw tangkai ni tura inzirtir mek a nih thu sawi a ni.
Sports & Youth Services department-in an hnuaia NCC leh NSS bakah adventure club 81 hnenah vote thlak tura infuihna leh midangte zirtir chhawng tura ngenna an thawn chhuak a, digital flyers bakah kawng hrang hranga hma an lak dan an sawi.
Science & Technology department chuan an thawhpui NGO-te kaltlanga hma la tura an inbuatsaih dan an sawi a. Mizoram Pollution Control Board hnenah an hnuaia eco-club te nen thawkhoa hma la tura ngen nise an ti.