Central bawiha tang loin thiana siam kan tum zawk – Lalrinpuii

Centre-ah tu pawh sawrkar se, an bawiha tang loin thiana siama thawhpui an tum zawk tih ZPM hruaitu, minister Lalrinpuii chuan a sawi.
Ningania Siaha Bazar-a MP inthlan campaign puala vantlang inkhawmah Lalrinpuii chuan, Pathianin ram hruaitu turin mi ruat a nei thin a, tun hi ZPM tana chunglam hun ruat nia a hriat thu a sawi. “Min enchhin rawh u, tiin inthlahrung takin mipui kan ngen a, enchhin mai ni loin beiseina sang tak nen sawrkarna min pe ta hi kan lawm hle. Kumin MP inthlanah pawh duhsak taka min hlankai leh ngei kan beisei a, chutihrualin, BJP sangawizawnpui MP kan nei leh ang tih hi thil hlauhthawnawm tak a ni a, kan ram leh kan sakhuaah nghawng tha lo tak nei thei a nih avangin kan fimkhur a ngai a. Kan ram, kan hnam leh sakhua a dam theih nan tun MP inthlanah hian kan vote-na tur hi kan chian a ngai,” a ti.
Tunge ZPM-in centre-ah a thawhpui dawn tih zawhna an dawng fo a, an chhanna chu, centre-ah tu pawh sawrkar se an bawiha tang loin thiana siama thawhpui an tum a; anmahnia lut siloin issue based-in huai takin an che dawn, tih chu an chhanna leh nghet taka an dinna a ni tih minister hian a sawi.
MP atana an party-in a chhawp chhuah Richard Vanlalhmangaiha chu Vairama pianga seilian, Vai tawng leh Sap tawng mahni tawng ang maia thiam, Vai ho nunphung leh zia hrechiang em emtu a ni, tiin, “Mizoram mipuiin kan mamawh engkim min thlensak theitu tur kan mi mamawh tak a ni,” a ti.