BJP te sorkar remti lo turin ngen

Makkal Needhi Maiam (MNM) founder Kamal Haasan chuan Prime Minister Narendra Modi leh BJP te chuan ram rorelna an chan leh remti lo turin Tamil Nadu mipui te a ngen.
VCK president leh INDIA bloc’s Chidambaram Parliamentary (Reserved) candidate Thol. Thirumavalavan tana a campaign naah Haasan chuan BJP kaihhruai National Democratic Alliance (NDA) chu social justice duh lo an ni a ti a. BJP te hian democracy an duh lo, thuneihna an chang leh a nih chuan kan ram democratic principles te hi an chhuchat vek ang, tiin a sawi.
Haasan chuan India ram democracy chu dinhmun derthawngah a awm mek tia sawiin chuvang chuan secular duh party te chu inthurualin democracy humhim nan leh BJP laka ram a him nan ke an pen ho tiin a sawi bawk a.
“Casteism hi politics a ka hmelma ber a ni a. Ka nun leh ka cinema ah pawh caste in hmun a chang lo” tiin Haasan chuan a sawi bawk a.
Central sorkar chuan tun hnai kum 10 chhungin engmah tih a nei lo a ti bawk a. Sorkar chuan loneitute lakah pawh a thutiam a tihlawhtlng thei lo va, tihhlawhtlin a hnekin hnawh tiau nan water cannon a hmang zawk a ti bawk a. BJP te chuan kum katah hna vaibelchhe hnih tiamin an hlawhchham chiang hle a ti bawk.
Actor atanga politician a inlet Haasan chuan Centre chuan Tamil sanghaman tute pawh a humhim thei lo tia sawi bawkin loneitu, thalai leh hmeichhia te pawh a tibeidawng vek a ti bawk a. Minority te thlauhthla in hlau hlawpin hun an hmang bawk tia sawiin BJP te hi rorel tir zui chi an ni tawh lo tiin a sawi bawk.