Lawngtlai leh Siaha inbuatsaih dan thlirho

Lok Sabha inthlanpui atana Mizorama police observer atana ruat K Satyanarayan leh expenditure observer Anita Rinesh te hoin Lawngtlai leh Siaha district official-te leh political party aiawhte nen inpuahchahna thlirin Thawhtanni khan an thukhawm.
Lawngtlai district election officer Cheemala Siva Gopal Reddy chuan an district inpuahchah dan a sawi a. Lawngtlai leh Siaha SP-ten police inpuahchah dan powerpoint presentation hmangin an entir. Lawngtlai leh Siaha Election Expenditure Monitoring nodal officer-ten election expenditure kaihhnawih thil an vil dan an entir.
Police observer leh expenditure observer-ten inthlanpui atana Lawngtlai district inpuahchahna chu tha thawkhata an hriat thu sawiin, DEO leh election official-te leh mawhphurhna neite hnenah an thawhrimna avangin lawmthu an sawi a ni.
Lawngtlai district-ah hian assembly bial pathum awmin, a vaiin polling station 181 a awm a. Chu’ng zinga PS 20 chu hmeichhe hlangin inthlan an buaipuina tur a ni. Tun dinhmunah venhimna uluk ngaih zual bikna critical polling station a awm loa, Assembly bial tinah inthlan campaign kalpui danah dan bawhchhiatna a awm lohna tur leh felfai taka kalpui a nih theihna tura viltu awm a ni.