MVA ten seat-sharing deal siam fel ta

Opposition Maha Vikas Aghadi te chuan April 9 khan Lok Sabha poll atan seat-sharing formula an neih te puangin Shiv Sena (UBT) te chuan seat 21 an chang a, Congress ten seat 17 leh NCP (SP) ten seat 10 an chang thung.
Congress te chuan Sangli leh Bhiwandi seat an hauh bur chu inphahhniam thei tain heng seat hnihah hian Sena (UBT) leh NCP (SP) ten an chuh ang.
Sena (UBT) te chuan alliance thil tum ber chu Bharatiya Janata Dal (BJP) te hneh a ni an tih laiin Congress te chuan alliance hlawh tlin nan rilru zau tak put an thlang a ni an ti ve thung.
NCP (SP) chief Sharad Pawar, Shiv Sena (UBT) leader Uddhav Thackeray leh State Congress president Nana Patole te chuan kar tam tak parliamenatry seat 48 insem dan tur an ngaihtuah hnuah thutlukna siamin an puang thei ta a ni.
Press Conference ‘Shivalaya’ south Mumbai a Shiv Sena (UBT) office a neihah party head leh state chief minister hlui Uddhav Thackeray chuan seat-sharing deal an siam tak thu sawiin BJP te paihthla turin an chak a ngai tiin a sawi a.
Shiv Sena (UBT) tena Congress te hnena Sangli seat an pek duh loh chungchangah, “BJP te paihthlak chu thil tum lian ber a nih chuan ngaihdan inang lo te dahthat mai a ngai a ni” tiin a sawi.
Thackeray chuan thil thleng rual danglam tak a awm tia sawiin “surya grahan” (solar eclipse), “amavasya” (new moon) leh BJP rally te chu a rualin nikhatah Thawhtanni khan a thleng rual a ni a ti.
“Nimina Prime Minister Modi thusawi kha prime minister thusawi atana awm ang lo a ni. Kan chhanlet in, prime minister hmuhsitna angah lo ngai suh ang che u. Kan sawiselna te chu corrupt party leader a nihnaah a ni zawk ang” tiin Modi an Thackeray kaihhruaitu ‘fake Shiv Sena’ tia a sawi chungchang zawhna a chhang a ni.
BJP te hi ‘party of extortionists’ (dan lo a mi sum chhuhsak) a ni a, chu chu electoral bonds scam lailan takah khan a chiang hle a ni tiin Thackeray chuan a sawi.
Maharashtra Congress president Nana Patole chuan PM Modi leh BJP te paihthlak an nih theih nan an party chuan rilru zau an pu a ni tiin a sawi a. Congress worker te chuan BJP te beiin Sangli leh Bhiwandi-ah MVA candidate a chak ngei theih nan an bei ang a ti bawk a.
“Kan workers te chuan BJP ten kan leader Sonia Gandhi leh Rahul Gandhi dik lo taka an tih dan hi an theihnghilh thei lo” tiin Patole chuan a sawi bawk.
Patole chuan Thackeray leh Sharad Pawar party te chu rebel ten an hijack ti bawkin, “Original party leader te kan bulah an awm a, Modi chuan Uddhav Thackeray kaihhruai chu fake Shiv Sena a ti thung” tiin a sawi bawk.
Inremna angin Shiv Sena (UBT) te chuan Jalgaon, Parbhani, Nashik, Palghar, Kalyan, Thane, Raigad, Maval, Osmanabad, Ratnagiri-Sindhudurg, Buldhana, Hathkanangkale, Aurangabad, Shirdi, Sangli, Hingoli, Yavatmal-Washim, Mumbai South, Mumbai South Central, Mumbai North West leh Mumbai North East seats te an chang a.
Congress te chuan Nandurbar, Dhule, Akola, Amravati, Nagpur, Bhandara-Gondia, Gadchiroli-Chimur, Chandrapur, Nanded, Jalna, Mumbai North Central, Mumbai North, Pune, Latur, Solapur, Kolhapur leh Ramtek seats te an chang thung a.
NCP(SP) te chuan Baramati, Shirur, Satara, Bhiwandi, Dindori, Madha, Raver, Wardhan, Ahmednagar South leh Beed seats te an chang thung a ni. Lok Sabha inthlan chu Maharashtra ah thawh nga lai April 19 atanga May 20 inkar chhungin neih a ni ang.