Sawrkar hnathawkte chunga ngaihdam dil turin CM phut

Mizoram sawrkar hnathawkte a sawi danah thudik lo hmanga inpuhchhiatna nia an hriat avangin kumin April 18 ral hma ngeia sawrkar hnathawkte hnenah ngaihdam dil turin MNF Thalai chuan chief minister Lalduhoma an phut tih an sawi.MNF Thalai Hqrs. vice president Zodinpuia chuan, chief minister hian Shillong-a a zinnaa amah kawmtute hmaah Mizoram sawrkar hnathawkte chu a chhe thei ang bera puhin, pawl angte, association angte, a department pum angte do let tum mek an awm a. A bikin Police department-ah chu chu a awm mek, tia a sawi thu sawichhawngin, “He thil hi thudik lo hmanga sawrkar hnathawkte puhchhiatna ni ngeia kan hriat avang leh, a thusawi hi Mizoram sawrkar hnathawk zawng zawng hmai tibaltu a nih avangin 2024 April 18 hma ngeia Mizoram sawrkar hnathawkte chunga ngaihdam dil turin chief minister Pu Lalduhawma hi kan phut a ni,” a ti.
Hun reilote chief minister a nih chhungin Lalduhoma chu Mizoram sawrkar hnathawkte diriam zawnga thu sawi hnem tawhah puhin, Assembly Budget Session neih zawh takah pawh Mizoram Police-te chu diriamin Mizoram mipui hmaah, police-te chu thlamuanpui tlak an nih loh thu uar takin a sawi tih sawiin, “Hetianga kan ram hruaitu lu berin a hnathawkte rilru tihnual thei zawnga thu a sawi fo mai hian Mizoram sawrkar inrelbawlna kawngah ngawng thalo a nei ang tih kan hlauhpui hle,” a ti.
Pu Lalduhoma kaihhruai ZPM sawrkar chu midang sawichhiatna lamah a sang filawr hle tih MNF Thalai hruaitu hian sawiin, Mizoram sawrkar kal tawh zawng zawng zingah ni 100 chhunga midang sawisel nasa ber leh ram mipui thudik lo min hrilh nasa ber a la nih hial a rin thu a sawi. Thla thum bawr chauh sawrkarna an kalpui chhungin Mizo thalai leh zirlaite beidawnna nasa takin an thlen a, MLA inthlanpui neih hmaa kuthnathawktute leh thalaite tana an intiamna chu an sawi zuzi chho tan mek tih a sawi bawk.
“Thalai hna zawng mek leh zirlaiten tangkai taka an chhawr MSSSB chu chhan mumal awm loin, ‘MNF sawrkar din a ni’ tih vang ringawtin thiah a ni a, vawiin thlengin MPSC thuamchak tura an hmalakna erawh Mizo mipuiin kan la hre lo,” a ti.
ZPM party chuan sawrkarna an chan chuan Development Bank an din dawn thu leh chumi kaltlang chuan thalaite hnenah loan pung awm lo chi an pek dawn thu te, sawrkar chu a thlawna guarantor-a a tan dawn thu te an tlangaupui a. Sawrkarna fawng an vawn hnu ah erawh ‘Mizoram Ceiling on Government Guarantees Act’ kan lo neih avangin loan pung awmloa pek leh a thlawna sawrkar guarantor-a tan chu tihhlawhtlin mai theih a ni lo, tiin mipui leh thalaite an bum leh mek tih Zodinpuia hian a sawi a ni.