Tih takzeta hna thawh chuan central sawrkarin min pui chak – Lalthansanga

Ram leh mipui tana tih takzeta hna thawh chuan central-ah tu pawh sawrkar se, min puih an chak em em tih ZPM hruaitu, minister Lalthansanga chuan a sawi.
MP inthlan atan Hachhek biala campaign Lalthansanga chuan, sawrkara minister a nih anga a department enkawl hnathawh dan mipui a hrilhfiah a. Sawrkar chuan mipui a dah pawimawh ber a, kuhva tám enkawlna tur bungrua leh hmanrua engemawzat an tifel thawkhat tawh a, a skop-na tur pawh Zamuanga kalpui turin project siam a ni tih a sawi. Tunhnaiah India rama Rubber Board hotu ber lokalin rubber tharchhuah kawngah Rubber Mission an kalpui dawn a, Regional Office tur an tifel tep tawh tih a sawi bawk.
Sangha khawitute tan sangha chi man tlawm zawka pe chhuak tur leh sangha dil ti hmasawn zel turin an inbuatsaih a; February khan chief minister hoin Thenzawlah pangang khawina project pathum bul an tan thar a, Silk Board hotuten an telpui tih a sawi. “Kan ram leh mipui tan tihtakzeta hna kan thawh phawt chuan, central-ah khuan tupawh sawrkar se min pui chak em em a, keimahni lam hi taima takin thawk ang u. ZPM sawrkar chuan awmze nei loa sum hmanral leh development sum chheprelh a duh loa, official leh farmer ten taima leh dik takin hna thawk ang u,” a ti.
MP inthlan chu ZPM chuan a la thutak hle a, an candidate Pu Richard Vanlalhmangaiha chu Nomination Committee-in uluk taka ngaihtuahna senga a thlanchhuah niin, Zoram hmasawnna pawchhuak turin an ring tawk a, ZPM sawrkar a chak lehzual theih nan hnehna sang tak a chan theih nan vote pui turin a sawm tih a sawi a ni.