Myanmar-a India ram palaia awm turin ramri bul a tlawh

Indian Ambassador to Myanmar mawhphurhna chelh tura ruat, ambassador- designate to Myanmar Abhay Thakur, IFS chuan zankhat riaka Champhai tlawhin Nilaini zan khan Champhai a thleng a. District bawrhsap James Lalrinchhana hoin an lo dawngsawng.
India palai hian Nilaini chawhnu khan Mizoram thlengin Champhai a pan nghal a. Ningani khan district official, NGO leh ramri behchhana sumdawngte a kawm. Myanmar-a India palai hna a zawm hmaa a kaihhnawih mi pawimawhte nen an inkawm chu lawmawm a tih thu sawiin, ram pahnih inkarah inlaichinna tha a awm theih nan tanrual a pawimawh tih a sawi. Ram himna leh hmasawnna chu thil kalkawp tlat a nih avangin tun dinhmunah thil tih harsa rih mah se, nakin lawkah ramri kaltlanga insumdawn tawn leh hmasawnna dang pawh dan pangngaia thawh leh theih a beisei tih a sawi a. Culture leh tourism chawisan kawnga thawhho, kawngpui siam leh hmasawnna ruhrel dang ngaihpawimawh a ni, tiin, ramri kaltlanga dan loa thil tih do kawngah theihtawp chhuah tlan a tul tih a sawi.
NGO aiawhte chuan free movement regime tihtawp leh ramri hung an do tlat tih an lo thlen a. Inkalpawhna kawngpui, raltlan chungchang, border trade, ramri kaltlanga ruihhlo tawlh ven leh pawimawh danga ngaihdan leh rawtna an neihte an lo thlen bawk.
District bawrhsap chuan India ram aiawha Myanmara rama palai tur Abhay Thakur-a’n Champhai district an lo lawm tih a sawi a. Champhai district chu ramri depa awm, district pawimawh tak a ni a, thenawm rambuai avangin refugee camp 23 a awm mek tih sawiin, sawrkar tha tichaktu NGO, kohhran, pawl leh mimal tlawmngaite nen theihtawp chhuaha buaipui an ni tih a sawi. Ruihhlo do leh ven kawngah thawhhona tha tak neih a nih thu a sawi bawk.
Hemi hnu hian Zokhawthar tlawhin, ramri kaltlanga insumdawn tawnna leh hemi kawnga hmalakna enfiahin a zirchiang a. Land Custom Station Zokhawthar, Immigration Check Post leh Assam Rifles COB Zokhawthar a tlawh. Chawhnu lamah Aizawl panin a let a ni.
Ambassador- designate to Myanmar hi DIG (Eastern Range) Thomas Zodingliana, Home joint secretary Lalthiamsanga Sailo, state protocol officer K Laltlawmlova, Commerce deputy director Ronald Lalchhuanawma leh official dangten an tawiawm a ni.