Enchhin ngai lo, a tha tih hriatchian sa hi a tha ber – Dr R Lalthangliana

MP atana enchhin ngai lo, inzirchawp ngai lo, a tha tih kan hriat sa leh ram leh hmangaih takzet mi, K Vanlalvena chu Lok Sabha MP atan a tha ber tih MNF senior vice president Dr R Lalthangliana chuan a sawi.
MP inthlanpui neih tura Siaha leh Lawngtlai district-a an campaign-naah MNF senior vice president chuan, K Vanlalvena chu enchhin ve ngai lo, kum 3 leh thla 8 enchhin tawh, mipui pawhin amah chu tunge a nih kan hriatchian tawh a ni, tiin, “Parliament-a experience nei tha tak, central sawrkara official leh politician hmelhriat nei tha, inzirchawp ngai lo a ni a. Tuna kan candidate dangte nena khaikhin chuan a tha ber,” a ti.
Myanmar unaute nasa taka an thlavang hauh a, communist rorelna ang maia Manipur-a Zohnahthlakte tan Parliament-a nasa taka auchhuaktu awmchhun a ni tih sawiin, “Hnam thinlung pu, ram leh hnam hmangaih takzet mi, a koa mawhphurhna awm tawh hlen chhuah tum tlat mi a ni,” tiin K Vanlalvena chungchang a sawi.
MP candidate K Vanlalvena chuan hnam hnufual leh sakhaw te zawkte humhalh leh humhim an ngai a, Rajya Sabha MP a nih anga an dinhmun chawikan leh humhimna tura a beih thin ang khan, Lok Sabha MP-a a tlin chuan theihtawp a chhuah chhunzawm dawn tih a sawi. MP pakhat ve mai tan a harsa a nih pawhin, nasa takin a nawr zel anga, a bei nasa hle bawk dawn tih a sawi a ni.