Lok Sabha-ah NE state pawimawh

Northeastern State pariat-ah Lok Sabha seat 25 a awm a, kum 1989 a coalition era intan hma kha chuan belhna mai mai anga ngaih a ni thin a, tunah erawh chuan Centre huap pawhin pawimawh lutuk a ni tawh. Kum 2024 inthlanah pawh northeastern seat te chu rorel tumte tan chuan pawimawh tak a ni.
Neutral nia insawi Assam a All India United Democratic Front (AIUDF) leh Mizoram a ruling Zoram People’s Movement te huam lovin northeast a regional party tam ber te chu BJP kaihhruai North East Democratic Alliance-a tel vek niin chuvangin Centre a BJP kaihhruai National Democratic Alliance a tel nghal ang an ni a. Assam a Jatiya Parishad (AJP) leh activist hlui Akhil Gogoi kaihhruai Raijor Dal te erawh Congress khalh Indian National Developmental, Inclusive Alliance ah an tel thung.
Kum 2019 inthlanpuiah khan NDA te chuan parliamentary seat 25 awmah 19 an la a, kumin hian chu aia tam chu lak tumin ram pumah Lok Sabha seat 400 lak chu thupui berah an nei a ni. “Kumin hian northeast ah 22 kan lak phak kan ring” tiin Assam Chief Minister Himanta Biswa Sarma chuan a sawi.

Assembly poll nena nei rual tur
Inthlan thawhkhatna Aril 19 a neihah Lok Sabha constituency 16 northeast bikah neih a ni dawn a, chutihrual chuan Arunachal Pradesh leh Sikkim te chuan Assembly election an nei nghal bawk ang. Parliament seat pakua la awm te chu Assam vek niin inthlan thawh hnihnaah neih a ni thung ang.
BJP te chu Arunachal Pradesh-ah an dinhmun tha hle in Assembly member 60 awmnaah chuhtu awm lovin 10 chu tlinga puan an ni der tawh a. Assembly seat 50 tal lak an inring bawk.
BJP te chuan Sikkim ah Lok Sabha seat bakah Assembly seat 32 chu chuh vek an tum bawk a, BJP te chuan Sikkim rorel lai Krantikari Morcha te nena an thawhhona an chhuchat bawk.

Fluid alliances
Meghalaya Chief Minister leh National People’s Party (NPP) chief Conrad K. Sangma chuan Arunachal Pradesh a Lok Sabha seat hnihah BJP te an thlawp tur thu a sawi a. Mahse, Assembly inthlanah erawh BJP te nen an thawkho dawn lo thung. BJP te pawhin Meghalaya bikah chuan NPP te an thlawp dawn bawk.
Assam ah BJP te chuan seat 14 awmah seat 11 an chuh dawn a, seat hnih dang chu Asom Gana Parishad te pe in seat khat chu united People’s Party Liberal te an pe bawk.
Congress te chuan Assam a Lok Sabha seat 13 an chuh thung dawn a, pakhat erawh AJP te an pe ve thung ang.

BJP te tihtawp harsa
INDIA bloc an che tha dawn tiin Congress te chuan northeast ah NDA te chu an hneh theih an ring a. “Kan tum ber chu majoritarian party ten thuneihna atchilha chelh zel an tum dan a ni” tiin Gaurav Gogoi, northeast Congress leader chuan a sawi a, kumin hian Jorhat Lok Sabha seat a chuh ang.
Mahse Congress te chuan tun hmaa an chak thinna an hloh thung a. Arunachal Pradesh, Manipur, Mizoram, Sikkim, Nagaland leh Tripura ah te an sorkar lo bawk a, heng state belhkhawmah hian Lok Sabha seat pakua a awm.
Kum 2019 a seat li an lakah khan Assam atangin seat thum a tel a. Kaliabor seat chu nuaibo a ni tawh a, Barpeta leh Nagaon seat pawh kum 2023 delimitation exercise ah siam danglam a ni. Seat khat dang chu Meghalaya a an lak a ni thung.
Congress te chuan Manipur a Lok Sabha seat hnih te chu an lak theih an ring a. Inner Manipur chu Imphal Valley tuamtu niin Outer Manipur erawh tlangram tribal te chenna a ni thung. Congress te chuan Prime Minister Modi an a ngaihsak lo ti leh Chief Minister N. Biren Singh hnuaiah buainaa hnuhluhin an awm tih chu auhla berah an nei.
BJP te thawhpui Naga People’s Front (NPP)te chuan Outer Manipur ah Kuki-Zo community tena constituency mipui zahve dawn an hauhnaah chak an inring bawk.