US in China car khap mai thei

President Joe Biden chu Chinese siam electric car te US a lakluh khap tura nawr mek a ni.
Senate Banking Committee chair Senator Sherrod Brown chuan, “Chinese electric vehicle te chu American auto industry tana hlauhawm an ni” tiin a sawi a.
US lawmaker in heti lam hawia tawngkam an neih tawh zinga na ber niin thenkhatte chuan Chinede electric vehicles (EV) te hnawl a nih theih nan chhiah sang tak lak an rawt thung.
February thla khan White House chuan US chuan Chinese car te chu national security tana pawi thei a ni em tih an chhuichiang tur thu a lo sawi tawh bawk a ni.
“China in sorkar thlawpa bumna hmanga American auto indutry a tihchhiat kan remti thei lo” tiin Senator Brown chuan social media platform X ah a tarlang.
Senator Brown hi car siam chhuah tamna state Ohio atanga Democrat Senator niin November thla inthlanah chuh leh a tum a ni.
February thla daih tawh khan President Biden chuan China policy te chuan an vehicle hmangin kan market an luahlum thei a, chu chu national security atana hlawm thei a ni a, ka mit hmuh laia a thlen ka remti dawn lo tiin a lo sawi tawh a ni.
Washington chuan Chinese siam car te chuan an driver leh passenger te data pawimawh tam tak an la thei dawna ngaihna a nei a, chuvang chuan khuahkhirhna pawh kalpui thei a ni.
Internet hmang car te chuan an camera leh sensor te chu US infrastructure information lak nan an hmang thei a ni an ti bawk.
China hi khawvela car siam chhuaktu lian ber niin thawnchhuak tam ber ni turin Japan nen an inum mek a ni.
Tunkar hian China ah US Treasury Secretary Janet Yellen chu kalin Beijing hnenah Washington chuan kum 2000 tirlama Chinese atanga burngrua lakluh tam lutuk avanga ‘China shock’ tih mai ang kha a thlen leh an remti dawn lo tiin a sawi.
China vice finance minister Liao Min chuan US in trade leh investment lama khuahkhirhna a siam chu an ngaimawh takzet tiin a chhang ve thung a. Liao chuan China in advantage a neihna chhan chu market a nei lian a, industrial system tha leh human resources a ngah vang a ni a ti bawk.
Ningani khan America a airlines lian berte chu Biden administration chuan US leh China inkarah flight thar kaltir rih tawh lo turin an hriattir bawk.
Secretary of State Antony Blinken hnena Transportation Department Secretary Pete Buttigieg an lehkhathawn a ziahah China in anti-competitive policy a kalpui chuan US carrier te chu dinhmun chhiaah a dah a ni a ti.