Hnahlan tana sum sawichhuak anga a insawi kha a ti ang lo hle – Ronald Sapa

Tuna ZPM MP candidate ni ta in, Hnahlan winery tana sum tam tak sawichhuak anga a insawi chu a ti ang lo hlea a hriat thu Rajya Sabha MP hlui Ronald Sapa Tlau chuan a sawi.
Zirtawpnia Congress Bhavan-a political session-ah Congress hruaitu Ronald Sapa Tlau chuan, ZPM MP candidate-in central atangin cheng vaibelchhe tel ama sawichhuah liau liau anga mipui hmaa a sawi duh chu a ti ang lo tih sawiin, MP a nih lai, kum 2018 khan Pu Richard Lalhmangaiha te hi a chenna in New Delhi-ah kalin sawrkarin MLTP Act a siam hnuah wine hralh a tla loa, grape chingtuten minimum support price an beisei tih an rawn sawi a, a tukah Agriculture secretary a hmuhpui ta tih a sawi.
Cheng vaibelchhe tel kaihhnawih a nih avangin a inchiah rei angreng a, a khat tawkin a va ngaihven reng a. 2019-ah khan inthlan laia Hnahlan khua a kalin mipui hmaa thu a sawi laiin central Agriculture secretary hian a rawn bia a, grape chingtute sum cheng vaibelchhe 3.5 a lakchhuah theih tawh tih thu a rawn hrilh a, mantang ei tur an awm leh awm loh a lo zawt a, a ni chuan cut then a awm a nih chuan ama sum atanga a hnawhkhah ngam tur thu sawi nghe nghe tih Ronald Sapa hian a sawi a ni.
“Tun hnuah vaibelchhe 3.75 a lang a, society-te sawi danin Pu Richie-a leh Pu Tlana hnenah 2.42 a lut tih thu te, 35% a inpe tih thute ka hria a. An ni hi vawi khat ka hruai a, vawi tam tak ka bawhzui a, Pu Hawla DO lehkha kha a pawimawh ber chu a ni, kei chuan ka sawichhuah tiin ka sawi ngai lem lo,” a ti.
ZPM-in issue based-a an kal tur thu an sawi chungchangah, BJP agenda zawng zawng hriat hnua neutral nih la tum chu hriatthiam har a tih thu Congress hruaitu hian sawiin, “Chungleng leh hnuaileng indo laia bak ang kha an nih chuan a tha lo hle,” a ti.