History bung thar siampuiah PC president-in mipui sawm

PC president Vanlalruata chuan tun MP inthlan turah an party-in history bung thar an siam tih sawiin, bung thar lian zawk pahnih aia tlem lo siampuiah mipui a sawm tih a sawi.
Zirtawpnia an office-a inkawmhoah PC president chuan, tun inthlanah history bung thar siamin Mizorama MP atana party hmeichhe candidate hmasa ber an ni a. Hmeichhe dinhmun chawisan an sawi thin avang leh India pawhin policy neia ram rorel khawla hmeichhia an tam theih nana hma a lak nasat zel avangin candidate atan hmeichhia an hmang a, an party chuan Mizo history-a reh tawh ngai lo tur bung thar an siam tih a sawi.
“Kan candidate hi thlantlin a nih chuan Mizo hmeichhia MP hmasa ber niin, history bung thar ropui zawk siam a ni dawn. Chu mai niloin, MP zawng zawngin anmahni biala office an neihna tur dan siamnan hma a la dawn a, hei hi a hlawhtlin ngei a rinawm avangin history bung thar ropui tak tak pahnih siam a ni dawn,” a ti.
Parliament-a dan thar siamna tur bill puluttu MP chu a tet theih loh avangin kan la hmuh ngai loh thil thar lian pui pui pawh hmuh a inbeiseiawm tih Vanlalruata hian a sawi a. An party candidate chu thlantlin a nih chuan a tlem berah history bung thar pathum siam a ni dawn tih sawiin, an candidate Rita Malsawmi vote turin mipui a sawm.