Barca-in Real kal fal tur dang hram hram

First half minute 37 liam hma chiaha Joao Felix-a overhead kick pui tak avangin Inrinni zan Spanish La Liga inkhel pakhatah Barcelona chuan sikhat faiin mualneitu Cadiz an hneh hram a, a hma lawka Mallorca khelmuala 1-0 hnehna bawk sualchhuak ve tho Real Madrid nena an inthlauhna chu a ngaiin a kal leh rih a, kartawp Santiago Bernabeu-a El Clasico hi team pahnih tan title an beiseina kawngah a pawimawh zual dawn a ni.
Table-a 18-na luah chunga tlahniam thei dinhmuna ding mek Cadiz laka Catalan team chakna goal ropui khungtu leh Atletico Madrid loanee ni bawk Felix khan season kal laiah Nou Camp club tan La Liga goal sarih a thun tling chiah.
Naktuk zan Champions League quarter-final second leg-a Paris St-Germain an hmachhawn tur thlir chungin Xavi chuan an game hnuhnungbera luh hmasak chang player pariat chu bench lamah a dah a, starting XI chang zingah rawlthar rual pathum – Pau Cubarsi, Hector Fort leh Vitor Roque an tel.
Team siksawi hian Barca game pawh a tibuai pha a, team talbuai mek Cadiz lakah first half chhungin goal thun theihna hun remchang siamchhuah an harsat a, Joao Felix-a magic-in a pui ta hlauh zawk a ni.
Inhamtan mamawh Cadiz pawh an tang a, an siphurh sut tumin an thawkrim a, substitute Diadie Samassekou long-range strike tha zet chu Barca keeper Marc-Andre ter Stegen chuan a dansak thei hram a ni.
La Liga table-a 18-na luah chhunzawm mek Cadiz khan point thumin himna hmun an chuangkai pha lo mek.