Phir inzawm upa ber an thi

Chhinchhiah theih china phir inzawm (cajoined twins) upa ber Lori leh Goerge Schapell, kum 62, te cu April ni 7 kan Pennsylvania-a damdawi inah an thi tih Guinness World Record chuan nimin khan an puang a, an thih chhan erawh puan a ni lo.
Lori leh George te hi 1961 khan an piang a, an pianhlimah an luruh inzawmin, bek insi rengin an awm a, thisenzam pawimawh an intawm bawk si avangin an luruh inzawm dan hi zai hran theih an ni lo a, an thluak pawh 30% an intawm a ni. Hetiang a nih rual hian George zawk hian spina bifida neiin, wheel-chair a hman a ngai a, Lori zawk hian a nawr kual vel mai thin a ni. An pian hlimah hian doctor te chuan kum 2-3 bak dam turah an ngai lo va, mahse, kum 60 chuang an dam ta a ni.
Lori leh George te hian kum 24 chung chu rilru lama harsatna nei te tana inzirna hmunah hun an hmang a, 1980’s khan Pennsylvania governor nupui Richard Thornburgh chuan an pangngai a ni tih a nemngheh sak hnuah an chhuak thei ta chauh a ni.
Heta tanga an chhuah hnuah hian anmahni oualin apartment neiin, room pawh an nei hrang thlap a, mahse, an lu a inzawm miau avangin thil a tih hran bik theih tak tak loh a, chutih chung chuan an room-ah an inriah chhawk ve thlap thlap thin.
George zawk hi country singer niin, Germany leh Japan-ah te pawh show neiin an lo kal ve zak zak tawh a, Lori zawk pawh hi 10-pin bowler niin, trophy te pawh a lo dawng ve zak zak tawh bawk. Lori hi damdawi inah thil tifaiin a thawk ve thin a, mahse, 1996 atang khan a chawlhsan ta a ni.
Lemchan lamah pawh hnuhma an nei a, 2004 khan Nip/Tuck episode-ah an inlan a, hetah hian surgeon ten zai hran tumin an zirchiang vel a, mahse, Lori leh George te hian khatianga inzai khan an duh ta lo a ni. Lori chuan Los Angeles Times-in an kawmnaah, “In zai hran lam hi ka rilru a awm lo. Pathian kutchhuak tih bawrhban tumna angah ka ngai,” a ti. Documentary hrang hrangah an inlan bakah The Howard Stren Show leh The Jerry Springer Show-ah te pawh episode hrang hrangah an inlan tawh bawk.