Kan ram, hnam leh sakhua himna turin ka ding dawn – Vanlalhmuaka

Kan ram, kan hnam leh kan sakhua himna tura ding, mipui candidate dik tak zawk a ni tih BJP MP candidate Vanlalhmuaka chuan a sawi.
Thawhtannia an party office-a inkhawmah BJP State president ni bawk Vanlalhmuaka chuan, Congress party awmna leh sawrkar apiangah buaina a awm thin a, Indian history thlirin Congress party avang hian harsatna kan tawk thin a. Mizoramah dawt politics kan tuipui rei tak avangin kan state-in a tuar nasa a, development chhenfakawm tak hmuh tur mumal a awm loh avangin retheihna in min tuam tih a sawi.
Congress party chu sakhuaah an buai hle a, sakhuana hmanga vote zawng thin ni mah se, an thusawite belhchian dawl a awm loh avang leh anmahni ah sakhuana in awmzia a awm chuan loh avangin tunah chuan an tuar phah a, India ramah an ral mek a, Mizoramah pawh MLA pakhat chiah an neih phah ta tih a sawi bawk.
“Sakhuana leh politics kan kaihkawp dik loh avanga kan ramin a tawrhna hi a tawk tawh a, BJP-in development politics kan tlangaupui hmanga Mizoramah BJP MP candidate ka ni chung hian, mipui MP candidate ka ni zawk tih ka sawi duh a; kan ram kan hnam kan sakhua a himna turin Mizoram mipui aiawhin House-ah Mizoram tan ka ding dawn a ni,” a ti.