Khawvela inthlan lian ber kalpui dawn ta

India chuan Zirtawpni hian khawvela inthlanpui lian ber a kalpui dawn ta a. Ram chhengchhe tak atangin vur khuh Himalaya tlangah te leh ram ngaw hnawng churh karah te mipui billion chuangte chuan parliament member tur 543 an thlang dawn a ni.
April 19 a inthlan hmasak ber atanga kar ruk liam hnuah vote chhiar a ni chauh dawn a ni.

Inthlan hun chhung
Inthlan chuan ni 44 lawih a awh dawn a, kum 2019 inthlanah khan ni 39 chhung hun hman a ni thung.
Kumin inthlan hi India-in kum 1947 a independence a hmuh hnua inthlanna a huaihawt awh rei ber pahnihna a ni dawn a. Inthlan hun awh rei ber chu inthlan hmasak ber kha niin October 25, 1951 atangin February 21, 1952 inkar chhung neih a ni.
Kumin hian ni 44 chhungin vote thlak nisarih a awm dawn a. Vote thlak hmasak ber chu Zirtawpni hian neih ni dawnin constituency 102 ah inthlanna neih a ni ang a. Vote thlak ni hnuhnung ber chu June 1 ah neih ni dawnin seat 57 atan vote thlak a ni thung ang a. Vote te hi June 4-ah chhiar a ni dawn a ni.

Voter zat
India ram zau tak leh vote thlak thei tam em em na chu Lok Sabha inthlanin a awhrei chhan a ni.
Vote nei mi 968.6 million an awm a, chu chu European Union population pum 448 million aiin a let hnihin a tam zawk. Kum 2019 hnuah vote nei thei chu 8% in an pung a ni.
India ramah hian mipui 1.4 billion vel awm anga chhut niin nikum khan India chuan China khumin khawvela mihring tamna ber ram a ni bawk.

Geographical spread
India rama state 28 leh Union territory pariat te chuan thawhkhatah vote an thlak zo nghal vek dawn a, state lianah chuan constituency te vote thlak hun a in ang lo thung.
Entir nan, Uttar Pradesh chuan mipui 230 million a nei a, parliament member 80 a nei bawk a, inthlan thawh tinah vote thlak an awm ziah dawn thung.
Election Commission chuan fimkhur tak leh ruahmanna fel tak hnuaiah polling station tinah vote nei 1,500 aia tam awm lo turin ruahmanna a siam a ni.
Chumi tur atan chuan kumin hian polling station 1.048 million a siam a, sorkar building leh school te vote neitute awm hnaihna hmuna mite chu a hmang tlangpui a ni.

Security
India election history chu tharumthawhna leh vote-rigging tih tena a bawhbuai reng thin a ni a, mahse, tun hnaiah chung te chu nasa taka tihhniamin a awm.
Inthlanna felfai leh thianghlim, mipui tena hlauhna nei lova vote an thlak theih nan federal security 300,000 chuang te chuan state sorkar thunun police te chu an thlawp dawn a ni.
Inthlan hun inang lote chu security personnel ten ram chhung hmun hrang hranga duty-a an kal kual theih phahna a ni bawk a. Election official te chu vengin voting machine te an veng bawk a, result puan a nih hma chuan voting machine te chu an veng dawn a ni.
India ram inthlanpui chu Election Commission of India kaihhruaina hnuaia neih niin felfai leh thianghlim thei ang bera kalpui thin a ni bawk a. Kumin pawh hian inthlanna felfai leh thianghlim bakah muanawm taka neih a nih theih nan Election Commission chuan ruahmanna hrang hrang siamin a duh firin buaina leh harsatna awm thei lakah pawh a fimkhur em em bawk a ni.