Vote nei mi 856364 awmna Mizoramin MP thlang dawn

Mizoram electoral roll thar berah vote nei 856364 an awm a, heng mite tana polling station 1276 ruahmanah vawiin – April 19 hian Lok Sabha MP inthlanpui neih a ni dawn.Zing dar 7 atanga tlai dar 5 thleng vote a thlak theih dawn a, sawrkar chuan public holiday-ah a puan bakah sawrkar hnathawk lote tan pawh hlawh kiam chuang loa chawlh ni ‘paid holiday’ atan puan a ni.
Inthlan buaipui tur polling party zingah an duty-na tur pan harsa zual deuh chu Nilaini khan an chhuak tawh a, hetiang hi polling station 168 a awm. Pan harsa lo deuh polling station-a duty tur polling party 1108 chuan Ningani khan an duty-na hmun tur an pan ve leh a; polling official hi mi 5071 ruat an ni.
Kumin inthlanpui atan hian candidate 6 awmin political party zingah BJP, INC, MNF, ZPM leh MPC ten candidate an nei a, MPC candidate hi hmeichhia niin independent candidate 1 awm nen a dang zawng chu mipa an ni. Mizorama inthlan vil tur hian Election Commission of India chuan general observer leh police observer pakhat ve ve leh expenditure observer pahnih a ruat a ni.
Polling station 1276 zingah hian thingtlang (rural) polling station 751 leh khawpui (urban) polling station 525 a awm a. Chawhrualin polling station pakhatah voter 671 zel an awm a, PS 765 ah polling booth-a chetvelna webcasting kaltlanga vil a ni.
Vote thlak ni a vote tlak dan hi darkar hnih dan zelah PollstarApp kaltlanga report zung zung tura ruahman a ni a, inbiakpawh harsatna hmunah erawh MPRO kaltlanga chanchin inhrilhhriat tum niin, district tina control room-ah pollstar nodal officer leh official dang bakah MPRO team an duty vek a ni.
Kum 85 chunglam leh PwD voter zingah in lama vote thlak duh tan ‘home voting’ kalpui a ni a, mobile polling team ten an chenna inah kalchilhin vote thlak tir an ni. Mizoram pumah April 4- 15 inkar khan home voting kalpui a ni a. Kum 85 chunglam 1792 leh PwD voters 317 ten vote an thlak.
Vote tla hi 2024 June 4 (Thawhlehni) ah chhiar tur niin, result puan nghal a ni dawn a. Vote chiarna tur counting hall hi Mizoram pumah counting centre 13 ruahman a ni. Aizawl district-ah counting centre 3 a awm anga, district dang zawngah pakhat theuh a awm ang.

8 Mizorama vote nei mi 856364 zinga 414805 chu mipa, hmeichhia 441559 an ni. Service voters 4963 (mipa 4872, hmeichhia 91) an awm. Kum 85 chunglam voters 4741 (mipa 2167, hmeichhia 2574) awmin, PwD voters 3397 (mipa 1876, hmeichhia 1521) an awm a, young voters (kum 18-19) 36370 (mipa 18659, hmeichhia 17711) an awm a ni.
8 Model polling station 25 awmin auxilliary polling station hi Lunglei district-ah 4 a awm a, hmeichhe hlangin an vil tur polling station (Pink Polling Station) 136, thalai hlangin an vil tur PS 7 leh PwD hlangin an vil tur PS 1 a awm.
8 Vote nei awm tamna ber chu Aizawl district niin voters 288304 (mipa 134838 leh hmeichhia 153466) an awm a, vote nei tlemna ber district chu Hnahthial niin voters 16223 (mipa 8008, hmeichhia 8215) an ni. Polling Station-a elector tamna ber chu Zemabawk-VIII (Aizawl district) niin elector tlemna ber chu Thehlep (Lunglei district) a ni.
8 Tun dinmunah inthlan duty tur leh EVM/VVPAT khawl indaih loh na a awm loa, EVM bakah VVPAT (Voter Verifiable Paper Trail) hi polling station 1276 ah hman a ni dawn.
8 Vulnerable polling station 14 (Kolasib district 7, Aizawl district 3, Champhai district 4), critical polling station 5 (Saitual district vek), lirthei luh lohna, kea pan ngai polling station 11 (Mamit district 6, Lunglei district 4, Lawngtlai district 1) leh lawngleng hmanga pan ngai polling station 15 (Lunglei district 13, Mamit district 2) a awm.
8 Venhimna lam thawk turin state police 3553 bakah central armed police forces (CAPF) company 12 an duty dawn a. Flying Squad Team 83 leh Static Surveillance Team 81 an awm a, check post (nakas) 52 siam niin, heng zinga 12 hi inter-state boundary-ah an awm a, a bak zawng hi state chhung hmun hrang hrangah dah a ni.
8 Model code of conduct puan a nih atanga April 15thlenga zu leh ruihhlo man hlut zawng chu Rs. 47,984,035 a tling tawh a. Silai 8 leh a mu thahnem tak bakah leh geletin 110 leh detonator 110 man a ni tawh.
8 Vote thlak zawh hnua EVM dahna tur strong room district tinah ruahman a ni a. Strong room hi 40 (Assembly constituency tin tan pakhat) awmin CAPF-ten strong room kawngkhar bulah chhunzan zawmin an veng anga, Mizoram armed police pawhin strong room awmna building hi chhunzan zawmin an veng dawn a ni.