Women Commission chairperson-a ruat tawh sut turin MSU-in a phut

Mizoram sawrkarin State Commission for Women chairperson atana a ruat chu he dinhmun chelh tura danin a phal chin bak kum a lo pelh tawh avangin sut leh turin Mizo Students’ Union chuan an phut tih an sawi.
MSU Gen. Hqrs chuan Mizoram State Commission for Women (MSCW) chairperson tur hi 2024 March 8-a Social Welfare, Tribal Affairs, Women & Child Development department-in appointment tichhuakin, AMC Ward No. III corporator ni lai C Lalchhandami chu ruat a ni tih a sawi a. Planning & Programme Implementation department-in kumin April 15-a RTI a chhannaa a lan danin, C Lalchhandami hi 2016 March 31 khan supernuation-in sawrkar hna atangin a pension a, chutihlaiin, MSCW chairperson atana ruat a nihnaa a inziah danin, ruat a nih atanga kum 3 chhung emaw kum 65 tlin hma, khawi emaw zawk zawk chhung office hna a chelh thei ang, tih a ni thung a, dan bawhchhiat a nei tih hriat a ni tih a sawi.
‘MSCW chairperson atana ruat hi, a pension kum atanga chhutin kumin hi a kum 68-na tur a ni. Hei bakah hian kum 2021 AMC inthlan pamphlet-a a kum tarlan atang pawhin kum 66 a ni ta hrim hrim a. Heti chunga kumin March 8-a ruat a nih chungchangah hian MSU chuan hriatthiam har kan ti hle a, sawrkarin dan dinglai kalha a ruat hi induhsakna vang liau liauah kan ngai a, dikna tundin nan he notification hi a rang thei ang bera sut leh turin kan ngen a ni,’ MSU chuan a ti.