Social media leh thuthar thehdarh
Tun hnaia Champhai North leh Champhai South Joint Village Council thukhawm chuan, Veng chhunga khuarel chhiatna emaw khawtlanga thil thleng ah, social media-a tarlan ngai chi a awm a nih chuan VC-te leh NGO hrang hrangten journalist-te hnena sawi chu duhtawk mai ni se, tiin an rel a. Hetianga an rel chhan hi, thuthar thlitfim loha social media-a tih chhuah pawp a nih thin avangin thuthar thehdarh tur chinah fimkhur a tul an ti a; journalist-te chuan a him chin leh mipui hriat tur chin an thli fim thin a ni, an ti.
Information technology lama hmasawnna hi kawng tam takah chhawr tangkai a nih laiin, a lehlamah chuan mihring nun tihchhiat theihna tam tak a awm bawk a. Hei hi ngun taka kan ngaihtuah a, chintawk kan neih thiam hi a pawimawh ta hle.
Social media kaltlanga rang tak taka thil thleng hriat zung zung theih a nih tak avang hian mi tam tak chuan TV leh chanchinbu lam hnuchhawnin an thlauhthla a, TV leh chanchinbu mamawh tawh lova inngaihna an nei a. Hetih lai hian, social media-a thu thehdarhtu tam tak chuan, hre hmasatu leh thehdarh hmasatu nih duhna avangin a dik leh dik loh finfiah mumal lovin an tichhuak pawp pawp a, a hnuah a dik zawk tichhuak leh pawh ni se, a dik lo zawk lo hre hmasatu tam tak chuan an hre zui leh tawh lova, hei hian a hnu lamah harsatna tam tak a thlen thei thin.
Mi tam tak chuan, social media-a thu thehdarhte hi a dik leh dik loh confirm nan chanchinbu, TV leh radio te an hmang leh tho thin. Hei hian a entir chu, social media-a thu thehdarhte an ring tawk lo tihna a ni a; an ring tawk lo a nih chuan, social media lama thu thehdarhten belhchian an dawl tawk lo fo tihna a ni nghal bawk awm e.
Social media a him lohna pakhat leh chu, thenkhatin video leh thlalakte censored lohvin, a ngial a nganin an tarlang thin a, hriselna pan deuh leh, naupang kum tling lo tan a him lo hle.
Journalist-te hi chu workshop/training hrang hrang paltlang thin an ni a, rilru fim tak pu chung leh journalism ethics ngai pawimawh chunga chanchinthar buatsaih thin an nihna hi a lang nge nge thin a. Hre hmasatu leh thehdarh hmasatu nih hi inelna a nih rualin, ngun taka thlitfim a nih hmaa thehdarh ngawt hi journalist-te chuan an duh ngai lo a ni.