Tlawng lui fintu lui tihfai thawhhnihna

Aizawl khawpui tui tlan luidung leh a chhehvel tihfai kawnga hma latu, Save the Riparian chuan a thawhnihna atan Tlawng lui fintu luite tih fai an tan leh a, ni 30 chhung atana ruahmanna siam chhinah hian Tuikual lui an tifai dawn.
Khatla North (Lalmalsawma Memorial School) bul luikawr atangin a thenfai hna hi Nilaini khan an tan a, PHE department hnuaia Project Management Unit (PMU) director H Duhkima’n a vailiam.
Save the Riparian hian kumin March 26 atanga April 20 chhung khan ‘20 Days Project’ an lo kalpui tawh a. He project hnuaiah hian ni 20 chhungin Model Veng leh Mission Vengthlang inrina Sakhisih lui, a vaiin km. 2.3 a thui tihfai hna an thawk a, he lui hian Tlawng lui a fin a ni. Hemi atang hian pawl leh mimal thahnemngai bakah zirlaite thlengin hnatlangin an thawkchhuak a, sawrkar department leh sumdawng miten sumfai leh thildangin an pui bawk.
20 Days Project hian mipui thinglungah thu a sawiin, faina kawnga hma la duh mi tamtak penchhuakin an hnatlang a, faina kawngah awareness nasa takin a thlen nia an hriat thu he pawla a bultumtute chuan an sawi a. Sakhisih lui dunga bawlhhlawh thenfai a nih hian mipui tui in tur thianghlimna leh luidunga ecological balance siamthat kawngah nasat takin kawngro a su tih an sawi. Ni 30 chhung project an kalpui turah pawh hian mipui thlawpna an ngen tih an sawi bawk.
Tun tuma an hmalakna hi PMU PHE department, Aizawl Municipal Corporation leh Urban Development & Poverty Alleviation department bultum a ni a. A bul tan ni ah hian Khatla Local Council leh YMA bakah Tourism leh PHE department thawktute an tel a. Khatla YMA hruaitute chuan Save the Riparian hmalakna chu a theih ang anga puih an inhuam tih an sawi a ni.