DEEPFAKE

Er. Chhungpuia Renthlei
Senior Technical Officer, NIELIT Aizawl

A taka hmel tha lem lo social media-ah hmeltha em em lawi site, milar leh politician thenkhat hmel ang tak pu si mak deuh a zai emaw, lam lai te, thlalak leh video clip mak deuh tak te, A tak tak emaw tih mai tur Cartoon ni si te hmuh tur a tam hle. Heng te hi Software changkang taka an siam chawp Deepfake an ni.
Deepfake chu:
Deepfake chu deep learning software hmanga thil lan dan, mihring hmel, chetzia leh aw ri siam danglam hi a ni. Kan nihna aiin kan lang tha thei a, kan lang chhe daih thei bawk. Tin, kan taksa thenkhat te midang ang daihin a siam theih bawk. Deep learning hi artificial intelligence (AI) chi khat, mihring ang maia a thil khawlkhawm te atanga awmze nei taka data remkhawm thei a ni. Uluk takin mihring thlalaka an hmel leh taksa pattern zirchiang a, heta tang hian an naupan laia an lan dan tur te, an upat hnua an lan dan tur te a chhut thei a, a tak tak ang thei tur berin thlalak a siam thei thin. Data a neih tam poh leh thil a hre theiin a chhut dik thei thin. A nihna takah chuan Deep learning hi machine learning peng pakhat a ni. Deepfake chu Deep learning leh Fake tihna a ni. A awmzia ber chu deep learning technology hmanga a tak ang chiah a ngaih theih, a lem(Fake) a photo, video leh voice an siam hi a nih ber chu.
Deepfake hmanna langsar zual te:
Film industry-ah Deepfake hi an hmang tam hle. Abik takin Deepfake hi photo processing atan an hmang nasa hle. Mi pahnih hmel inthlak thlengna Faceswap hi a lar hle. Tunlai film industry-ah pawh film star hmel an hawh a, an tel ve miah lohnaah pawh tel angin an lang thin. Hmai pawhfanna (Face synthesis) hi a lar hle bawk. Hmai an pawt fan vak mai a, mihring hmel danglam tak leh rap awm tak an siam thin. Tin, taksa parts thenkhat siam danglamna (Facial attributes & Expression manipulation) hi an hmang nasa bawk. An duh lai lai Mit, hnar, ka, beng, hmui an siam danglam thin. Lian deuh leh te deuh ten an siam a, a letling ten an dah a. Thlahrang film ah an hmang nasa hle. A tak leh a lem hriat hran theih loh khawpa changkang Cartoon leh scenary te an siam a. Heng te hmang hian Background scene a tak ang thei berin an siam a, building an ti chim a, motor an insut tir a, ram an ti kang bawk a. Keini film entu te phei chuan a tak tak emaw tiin hmuhnawm ti takin kan thlir thin a nih hi. Tin, Education atan deepfake hi an hmang tangkai hle bawk. Mihring taksa zir nan te, khawl hnathawh dan zir nan te leh leilung leh a chhunga thil awm zir nan te an hmang nasa hle.
Deepfake hi hriatchhuah theih a ni em?
Professional deepfakes software hmanga siam te hi chu a lem leh a tak hriat a har khawp mai. Free softwares leh apps hmanga siam te hi chu awlsam taka hriat theih a ni thung. A tlangpuiin thlalakah chuan color danglam bik te, plastic, glossy texture ang a hmel danglam bik te leh taksa lang full lo a hmel chauh lang thin te atangin a hriat theih viau. Video clip ah chuan blurring, shadows, light flickers leh motion atangin a hriat theih bawk. Thiam manglo siam phei chu hriat a awl luluk tlat. Professional deepfakes software hmanga mi thiam takin an siam te erawh chu a tak nen danglamna a awm meuh lo. Google, Amazon leh Facebook te pawh an buai ve map map khawp mai. Research an bei ve reng bawk a ni.
Deepfakes hi dan bawhchhiatna a ni em?
Deepfake hrim hrim hi thil sual (Illegal) a ni lo. Amaherawh chu intihhmingchhiatna, thil dik lo vawrhdarhna, mipat hmeihchhiatna leh thil sual tih nana siam a nih chuan thilsual lian tak (Crime) a ni thei. Mizoramah ngei pawh politician te hmui phun tidanglama an sawi nih miah lo thil sawi anga lantir te, mi thenkhat hmel tidanglama saruaka lantir te, mahni aw tidanglama mi thenkhat sawi anga dawt thu vawrh darh chiam chiam te, nuihzatthlak thei ang ber tura mi lar thenkhat hmel siam danglam te leh mahni hmel ti danglama midang hip tum nana propic a hman te kan ching hle mai.Heng te hian midangah nghawng thalo a nei a nih chuan thilsual a tling thin bawk.
Deepfake software hi kan tan a him em?
Deepfake free download software leh apps te hi malware thehdarh nan an hmang nasa hle. Kan install hian kan computer leh smartphone-ah malware luhna kawngka kan hawn tihna a ni ber mai. Heng software te hi kan open apiang hian adverstisement leh pop up click tur an rawn dah thin a, a chang chuan hengte hi automatic-in an rawn in play a, kan nghah ngar ngar a ngai thin. Hetih lai hian malware te chuan kan system an suasam ve thung a. Hetiang software thenkhat phei hi chu India sorkar pawhin hman a khap nghe nghe a. Lan mawi leh that kan duh luatah kan smartphone leh computer-in a tuar fo a, a chang phei chuan kan account hial min hack sak thin a, fimkhur a tul hle.
Aw le, Mizoram bikah Deepfake hi eizawnna emaw, thil tangkai taka hmang kan la tlem hle. Politics leh fiamthu nan te kan hmang a, kan hmanna tam ber erawh chu hmel lan thatna tan a ni ber. A bikin thalai leh nuvalai ten kan hmang uar hle. WhatsApp, Facebook leh Instagram a kan propic leh thlalak post te hi Deepfake software hmanga siam danglam a tam thin hle. Hard copy a tha lemlo tak te hian Softcopy a nalh taka lan kan duh si a, kan computer/Smartphone-in a tawrh phah fo. Nihna baka lan hmelthat lutuk hi tum lovin, Kan smartphone-in a rawn chhawm tel Photo processing software-a enhancement, light & Color correction-ah te hian lungawi tum mai ang u. Min duh tak taktute chuan kan Aadhaar card leh Electoral Photo ID ringawt pawh hi an lungdum viau a ni a!