Baguette sei ber an siam

French chawah chuan a ser zinga a mei an tih ang mai niin, baguette hi French chaw lar tak a ni a, chhangthawp ang deuh chi a ni. Chutiang chhang sei ber chu French chhang urtu ten an siam a, meter 140.53 (feet 461 vel) a sei a ni. A hmaa hetiang record chu Italian chhang urtu te siam a ni ve thung a, meter 132.62 (feet 435 vel) a ni ve thung a, he record hi kum nga vel a din hnuah French chhang urtute hian an rawn khum ta a ni.
He chhang sei zet mai hi France khawpui Paris bul lawka Sursenes-a Terrasse du Fécheray-a Suresnes Baguette Show-ah Pathianni kalta khan an siam a, Guinness World Record endiktu ten a hmunah endikin record an siam thu pawh an puang nghal a ni.
He chhang sei hi chhang urthiam 18 rualin an buaipui a, zing dar 3 atangin chhangphut hmetin an buaipui tan a, chhang ur nan hian oven awlsam taka laksawn zung zung theih, he event atana an siam bik hi an hmang a ni.
He chhang hian Guinness World Record a siam tih an puan hnuah a then chu zaiin, Nutella an tat a, mipui ei turin an sem zui ta a, a vang chu chenna nei lo ten zanriaha an hman atan tlai lamah an sem leh ta a ni.
French baguette-te hi chhangphut var, tui, yeast leh chi chauh hmangin an siam thin a, dan naranin 60 cm (inches 23.6) vela sei, 6cm (inches 2.4) vela lian a ni thin.