IN PHAL CHIAH MAW? (zu nghei ang aw)

Zoremi Hmar Zote

Zu kan zawrh tak tak lai kha chuan zualko a rawn au lauh lauh a, kan han ngaithla chiang a, pavalai emaw, tlangval emaw, kum 50 la tling lo bawk kha an lo ni leh thin. Kan rama zu kan zawrh tak hnu-a mipa an hek malh malh zia kha kan hre theuhin ka ring. Zawrh hma pawhin zu vanga thi chu ni e, an awm na meuh mai. Mahse zawrh hnu khan an awm an awm ta mai a, an awm deuh reng mai a, zawrh tawh loh hnu paw’n a duha te chu an la rui reng tho mai a, an la thi deuh reng bawk chu a nih hi!
Zu a’n vàn tâk si-ah chuan a sen chi kan tih mai te, beer thlengin a to ta em em mai si a, a duh tan chuan lei tur phei chu a vâng vak lo a ni mai thei; mahse a to em avangin mi nawlpui in phâk tawk chu ‘Local’ kan tih mai, Mizo siam tual chhung zu a ni ta mai a, an siam dan te ka hre lo va, a tha lo hle tih erawh an sawi fo mai. Buhfai hmanga siam, uluk leh a nih dan tur taka siam, Rakzu kan han tih mai thinte hi chu taksa hian a tuar lo deuh awm asin. Zu zawrh kan khap a, zu a chhe sawt a. Kan in lo thei si lo va, kan insum thei na hek lo. Chuvangin a nia, kan mipate, kum naupang te te-a an liam zung zung thin ni!
Hetia mipa hovin zu in in a, min liamsan zel mai a, in nupuite hmeithaia min siam zel a, neih ngamawm lo va kan tlangvalte in awm zel mai te chuan, kan ram hma lam hun tur hi a thim a nia aw. Rawlthar apiang deuhthawin Beer atangin zu in an rawn zir ve tan ta bawk si. In hmeichhiate hma lam hun tur hi ngaituah ve thin ula a va duhawm em!
Kum 30 – 50 lek lekah, posi nalh fe fein, nungchang tha awm zeta fit thum/fit ruk chhunga in mut sup sup mai te chuan, hmeithai hmel tha tak tak leh zu ngawlvei nupui nih hlau kan nula tituai nalh tak takte hi zu in ngai lo tlangval, Hmel no lo ve tak tak ten an la keuh var phuk phuk ang a, in lo nuihzat ruk thin veng mawng Liana te, Tluangluliana te khan a nia, in biak that ngam loh nula duhawm ho kha nei mai mai dawn ni! Sawng tet tut, kekawrte thawl tulh tulh, tarmit tawt tulh tulh, hmai tai hlur nupui nih duh lo hlir kan nih si avang hian lung a phang deuh tan a nia. Inthiam lo ru tak chunga thlan tur dang nei si lovin min siam ang a, hnamdang tlangvalin Mizo nula an rut zung zung palh thei tlat a ni! “In ngai lo an tam em mai a” I ti a ni thei, ni e, an tam mai; kan la inchuh luai luai dawn bawk. Tun ang renga kan mipate in hek a nih a, thang lo thar ten in rawn in ve zel bawk si chuan maw, kum 20 a liam leh meuh chuan Pavalai pawlah hmeichhe O.B kan thu ther fur palh thei tlat; In phal chiah maw?
Kohhran leh veng chhung tlawmngai pawl hruaitu zingah hmeichhia kan tam zawk ang a, ‘Hmeichhe man hi kan hlut dan nena chhut hian cheng singnga tal ni ve tawh rawh se’ tih te, ‘Sa sat association-ah hian mipa tel ve khap ni rawh se’ tih te kan put luh rup rup mai chuan, in fapate tho kha nupui man tur nei zo lo an ni lawi ang ka ring! Sa sat pawlah phei khi chuan tunah pawh hian hmeichhia kan tam zawk tawh mah hial lo maw?! Tuikhur ral kai lo finna hmanga ro rel a nih a, hmeichhe thuhnuaia thil a awm hnem poh leh kan ro a nawi lo thei dawn si lo a ni; In phal chiah maw?!
Zu i nghei duh loh va, i thih vat mai chuan maw, i nupui, i hmangaih em em, i fate nu, midang tana i phal hauh loh ngei kha, ‘Nuthlawi hmeltha’ tiin, Muansasata te, Mawilukira te vel mai maiin an la rim hut hut mai ang. A nulat lai pawha thang ve hat khawpa duhawm, nupuia i neih bik avang ringawt pawha i tan inchhuanna tham kha, Bengali vai chhe champ fe fe ten mi inhnuai thim deuh rek rukah Atta an la nuaitir an la nuaitir mai tur asin! In phal chiah maw?!
In pai lai atanga in hmangaih, nau duhawm taka a lo pian theih nan ti a, neih thinglung khawnga damdawi tha tinrenga in enkawl in fa duhawm tak mai kha ngaihtuah hmaih hauh suh! An lo piang a, duat takin nuin kan chawi lian a. =hian pawl rual an rawn ni chho a, thiante zingah chhuang takin “A pa” tiin, i chanchin a sawi thin a. A duh zawng leh it zawng a hmuhin “A pain min lei ve dawn” A ti mai a, a hlauh zawng a tawn pawhin, “A pain a ngam” A ti mai thin asin! Engkim tithei, hlauhawm zawng zawng ngam vek, khawvela pa huaisen ber leh thil ti thei ber anga ngai che a, pawm thlaptu che chu i fa chauh kha a ni a; i fa mita i ropuina ang em em kha khawvelah tu lakah mah i tawng tawh ngai dawn lo! A lei Pathian, a hmuh theih Pathian i nihzia lanna hmasa a ni bawk. I tel lova khawvel hmachhawn tura hnutchhiah a, i awm ve lohna lei hrehawm pal zal tura hnutchhiah i duh em ni? Khawvel nun hahthlak zia, harsatna hrang hrang pal tlang tur a tam zia ngaihtuah la, i tel lovin, a mangan chang pawha thlamuantu pa nei ve lovin, angaihna a hriat loh changa rawn tur pa nei ve lovin, amahin a pal ve nawk nawk dawn tihna a ni. In phal chiah maw?
In zel rawh u in ngam phawt chuan. In fa, hmeithai fa ni-a seiliante khan in hnung an rawn zui lovang tih a sawi theih miah loh! Retheih nen, pa ber uapna hnuaia awm loh nen, a fing zawkte in luahin an khawsa ang a, in fapate step kilkhawr deuh deuhah Bata slipper tawngtawl lam bunin chak deuh deuhin an kal fua fua ang a, inrinni tlaiah Ar misa leh Samtawk hlui eng tuarh tawh Polythene tenghneng zeta khaiin an kal faifuk rut rut mai tur asin!
In fanute te lahin puakpuan ung zeta nau lu lawk lil lel ak thle nguih chungin Mobile phone hmai rang zet, call balance awm lo, a sir vel khawk nuan tawh vei hum tut chungin second hand sale an chuh chak hlur ringawt ang! An thawveng phian tho mai thei. Fa rilru nei deuh in lo nei hlauh a nih a, hna tha tak an thawk hlauh a nih chuan a tha, mahse eng anga Officer lian pawh ni se, miin. “Siamzuheha fapa/ Ruatruirenga fapa” An la ti hram hram tur te hi a na ve a, i zu man atana sum i sen ral zozai te kha a uiawm aw!