Pyramid sak dan hrefiah tawh

Scientist-te chuan kum 4,000 kaltaa Egypt a pyramids 31 chung zinga khawvel huapa lar Giza complex te pawh sak a nih theih dan an hrefiah tawh tiin an sawi.
University of North Carolina Wilmington te chuan pyramid-te chu River Nile peng lui kamah sak a ni a, chu lui chu tunah chuan thlaler hnuaiah leh farmland chhilhin a awm tawh a ni an ti.
Kum tam tak chhung chu archaeologist-te chuan ancient Egyptian-te chuan pyramid sak nana hman lung phek turu tak takte lakkhawm nan a bul hnaia luite hmang tangkai lo chuan tihngaihna a awm lovah an ngai a ni.
Mahse khawiah nge lui chu a awm tih tumahin an hre lo va. ‘Tumahin lui chu khawiah nge a awm a, eng tianga lian nge a nih tih pawh hria an awm lo’ tiin study author pakhat Prof Eman Ghoneim chuan a sawi.
Researcher rualte chuan radar satellite imagery, historical maps, geophysicial survey leh sediment coring-te hmangin tun hmaa lui luanna tunah erawh khawkheng nasa leh sandstorm tena kum sang chuang kaltaa a chhilh tawhna hmun chu an hre thei ta a ni.
Radar technolo hmangin sand surface pawh theiin, chumi hmang chuan tun hmaa lui luan tawhnate leh ancient structure-te chu an finfiah thei ta a ni, tiin Prof Ghoneim chuan a sawi.
He zirchiannaa tel Dr Suzanne Onstine chuan lui luanna tak hriat leh waterway thil rit pui pui te, mihring leh hmanruate lakkhawmna finfiah theihna data kan neihte hmangin pyramid sak dan min hrilhfiah thei ta a ni tiin a sawi.
Researcher-te chuan tun hma a lui luang chu Ahramat branch tih niin ‘ahramat’ tih chu Arabic-a pyramids tihna niin 64km vela thui leh 200-700m vela zau niin an sawi.
Chu lui bul lawkah chuan kum 4,700 leh 3,7000 kal ta vel khan pyramids 31 a ding a ni. Tun hmain lui a awm ngei tih finfiah hian Giza leh Lisht tuna Saharan desert ni taa pyramid thahnem tak sak a nih theihna chhan a tifiah ta tia sawi a ni bawk.