Iran president Raisi helicopter chesualah thi

Kum 63-a upa Iranian President Ebrahim Raisi, Iranian foreign minister leh mi pawimawh dangte chu Iran khawthlang lama tlangramah an chuanna helicopter a chetsual avangin an thi.
Chhum a zin nasat avangin helicopter chu hmuh mai a ni lo va, darkar eng emaw fe an zawn hnuah hmuh chauh niin Iranian Crescent Society, Pir Hossein Koviland chuan a sawi.
Raisi leh Supreme Leader Ayatollah Ali Khamenei te chuan tun hnai lawk thla kalta khan drone hmanign Israel an bei chiam a, chu mai bakah uranium te pawh weapons-grade level a thlitfim an hnaih tawh hle a ni.
Chutih rualin Raisi kaihhruaina hnuaiah economy leh women’s right aia Shia theocracy kalpui ngun avangin lungawilohna liantham tak tak a awm reng bawk a ni.
Raisi hian Iran ram chhung East Azerbaijan tlawh tum niin State TV chuan Jolfa khawpui Azerbaijan nena inrina bul lawk Iranian capital Tehran atanga 600 km a hlaah helicopter chu a chesual tiin an sawi a.
Raisi bakah hian helicopter chhungah Iran Foreign Minister Hossein Amirabdollahian, East Azerbaijan province governor te leh official leh bodyguards te pawh an chuang tel tiin state-run IRNA news agency chuan a tarlang.
IRNA chuan helicopter tlakna hi ram ngaw tia sawiin tlangram a ni bawk a, khawchin a chhiat em avangin ruahsur nasa leh thli tleh nen chhanchhuah hna kalpui chak a har hle a ti bawk.
Islamic Republic a thuneitu lawk ber pawl ni tawhin kum 85 a upa Supreme leader Ayatollah Ali Khamenei tun hnaia hrisel lo tak tawh chu thlak ngei tura ngaih a ni a.
Iran hard-line president thihna hian Iranian policy emaw Islamic Republic emaw a tinghing dawn hauh lo va. Mahse, conservative hardliners ten thuneihna tin elected leh unelected thlenga an hauh vek thin system chu test-in a awm phah rin a ni thung.
Kum 1960 khan Iran holiest Shia Muslim shrine awmna Mashhad ah a piang a, a pa hnung zuiin puithiam a ni zui a, kum 15 a nih atangin seminary a kal tawh a ni.
Khawthlang ram thlawp Iran lal Shah paihthlak a nih theih nana kum 1979 revolution-ah khan zirlai a nih laia inhnamhnawihin kum 25 mi lek a nihin Tehran-ah deputy prosecutor a ni tawh.
Kum 1980 chhovah khan secret tribunal tih mai political prisoner sang chuangte tihhlum an nih nana judge pali te fuankhawmna ‘Death Committee’ tih bawka tel a ni bawk.
Death Committee tena leftist opposition group Mujahedin-e Khalq (MEK), People’s Mujahedin Organisation of Iran (PMOI) tia hriat lar bawk member thi tura an chungthu a rel te kha mi 5,000 chuang nia sawi niin an phumna pawh hriat lohah an phum bo vek a ni.