Police-in an vote an ring lo a ni ang – MNF adviser

Police-in an vote an ring lo nge, MP inthlanah police duty 1000 chuangin vote an thlak thei lo tih MNF adviser TC Pachhunga chuan a sawi.
Zirtawpnia MNF office – Mizo Hnam Runah inkhawmah TC Pachhunga chuan ZPM sawrkarin police-te nasa takin an tawng a, hrechiang miah loin an suspend a, thiam an chang leh si a. Police-in an vote an ring lo nge, inthlana police duty 1000 chuangin vote an thlak thei ta lo tih a sawi.
Kuhva ro tawlhruk pawh Home minister Pu K Sangdanga’n thla khat chhunga an tihtawp tur thu a sawi laiin, an titawp lo nasa a, High Court atangin insawifiah turin an ti ta hial zawk tih a sawi. Contract hna contractor ngeiin an thawk tawh ang, tia an sawite chu mumang mai a chang zo a. ZPM mi leh sain hlir work supervisor an inruat a, contract hna an thawk mup mup tih a sawi bawk.
“ZPM sawrkar hi a bilhah a tho lo nasa a, an insawi ang an ni loa, mipui beisei an pha lo em em a ni,” MNF adviser hian a ti.
Chief minister Pu Lalduhoma’n raltlan chungchangah sawrkar laipui a thilphal thu a sawi laiin, RTI chhannaa a lan danin central-in raltlan chhawmdawlna cheng khatmah an la pe lo a. MNF sawrkar khan zahawm takin raltlante a tuamhlawm tih a sawi.
ZPM chu thla 5 chhung an sawrkar tawh chhungin tlatluma an insawina central atangin cheng khat pawh an sawi chhuah sawi tur a la awm lo tih sawiin, “Sum enkawl thiam loa MNF min puhtute khan vaibelchhe tam tak sum an puk tawh a, SASCI sum thahnem tak an ti lapse bawk. Vaibelchhe 110 thlai thar lei nan an dah thu larsap-in a sawi a. Pakhatmah finalcial year hluiah khan an lei lo,” a ti.
Inremchenna kalpui tura insawi siin MLA hamthatna hrang hrang nasa taka an tihpun bakah CM adviser panga an neihte senso chu a tam uchuak hle, tiin, “Nuam an tawl a ni ringawt mai,” a ti bawk.