Mahmuaka Chhakchhuak
-- Advertisement --
Kum 2019-ah khan tukkhat Zodin square vela ka zing walk chu hmeichhe pakhat hi rui em em maiin a lo kal pai Tuang Tuang mai a, a hmel leh incheina ka enin min pangngai hmel tak a pu bawk si a, men pawh a meng hleithei lo a, vawnban vuan chung chuan thei leh thei loin a kal a, chiang deuhin a hmel ka en a, min kalpelh hnuah pawh chuan ding meuhin ka thlir zui vawng vawng bawk a. Ka rilruah chuan engvanginnge heti taka hmeichhia pangngai hmel tak a han ruih tak mai le tih zawhna chu a rawn awm nghal a.
Kan mizo society hi a hrechiang leh social work lama thawkte chuan a chhiat tawh zia an sawi chamchi a, dik pawh a dik narawh e. 1954 kuma mizo lalte ban an nih hmalama mizo society nawm dante kha a hre phak te chuan ha hipin an sawi fo Thin. A chhanchu khang hunlai khan khawtlang nun a nuam em em a, thingfakin kawngka an la do mai a, Police leh SRS te VDP te an awm a ngai lo a, Zawlbuk kha khawtlang enkawlna atana hmun hlu leh pawimawh em em a ni a. Tunah hian khang hunlai ang khan awm leh ang u ka tihna a nih hauh lo a, tum pawh ni ila a theih tawh kher loh ang. Nimahsela engvanga New Zealand ramah te chuan vawiinni thlengin Police in zurui an man tih thawm a rik ngai loh? Engvanga 1970-ahte khan a ram michengte nuaih 38 vel awm laia Police Forces 75 chauh awm nge an nih a, tunah pawh Police forces 5000 pawh an la neih tlin loh tih zawhna chi hrang hrangte hi a chhanna dik tak hre vek kher lo mah ila tuna kan Mizoram dinhmun mek aTang chuan vana rah ang a niin chilthli far duah duah chunga kan la thlir reng turte pawh a nih hmel rih.
Anni ramahte chuan misual rual tia kan hlauh em em Gang te hi an awm ve lo a, rukruk ching lah an awm ve hek lo. Chutiang taka ram nuam a nih theihna tur chuan an sakhaw inzirtirna dan a Tha bik nge, a mihring chengte an fel bik hrim hrim zawk ni ang? Sakhuana lama an dinhmun han en ila New Zealand ramah hian Christian 44.3% an awm mek a. Engvanga keini State, Christian 88.6% vel awmnaah hian nitin deuhthaw rukru man thawm hriat tur a awm reng bik a ruihhlo man thawm hriat tur a awm rengna chhan bik. Kan Aizawl khawpui hi a bik takin han sawi ila, In 20 dan emaw lek leka Biakin pakhat awm ang zel tluka Biakin a tam laiin tahla lian pui puiin kawngka kalh ala ngai reng tho a, kum tlinglo hmeichhe naupang aTanga pitar a kan ngaihte thleng pawha pawngsual duhtu an awm reng bawk a, Pathianni tuk tina biakbuk lawi Thin mai piah lamah hmel ena vantirhkoh tluk hial tur khawpa thianghlim hmel pu zinga mahni zahawmna pawh hum zo lo khawpa mahni taksa pawh hralh duhte kan awm hial bawk a, bible zakzeh chunga biakbuk pante zingah ngei pawh nitin hnathawhna lama rinawm chiah lem lote pawh sawi tur kan tam ta.Hetiang lam sawi neuh neuh chuan kan Kristianna hian Krista hnungzui lam ni loin Pseudo – Christian an tih, Kristian suak ang hi kan ni ta zawk tihna em ni ang. Chutiang khawvelah chuan khawlaia hmeichhe pangngai hmel tak rui ka hmuh pawh chu a demawm lutuk bik dawn em ni zawk le?
He hmeichhe rui ka hmuh hi a chanchin sawi thui tur ka hre hauh lo mai a, minute reilote ka hmu a, a kalliam a, ka hmu lo zui chu a ni mai bawk a. A hming ka hre lo a, a chhung leh khatte pawh ka hre hek lo. A thiante phei chu ka hre lo lehzual. Nimahsela ka hriat chhun chu hetia reilote ka hmuh zawk chauh hi a ni a, chu pawh a rui lai kher lehnghal. A inkhawm lai leh Tha taka a awm lai hmu leh ta ila ka nuih a za dawn nge ka fak viau zawk dawn tih phei chu ka sawi thei mai bik lo. Mi pakhat ka hmuh avanga hetia han sawi ta ka ni chauh nain ka hmuh loh tam tak te an awm ngei ang tih pawh ka ring nghal a, chhungkaw tinin kan buaipui dante pawh sawi tur tam tak a awm ngei bawk ang.
He kan pianna ram, kan tu leh fate zel pawhin chenna atana an la rawn hman tur hi keini hian hmangaih taka siamThat hna kan thawh a, kan enkawl ngai a ni. Kan history lama sawichian theih em em kan ramrite chu tunah kan humhalh hleithei ta meuh lote hi tu thiam loh nge ni ang a, Chakma rawn ngampa ta em em te hi tute vang nge ni ta ang le. Hetiang lama hma la tur hian tute kutah emaw dah bik loin keimahni Theuh hian hma kan la ngam dawn lawm ni. Krista zuitu kan nihna hi eng huna lantir tur nge ni ngai ang a, khawia lantir hi nge kan tum hlawm tak le. Dik tak chuan Pathianni tukah emaw chauh hian a tam berte hi chuan kan lantir a ni lawm ni?
Pathianni tukah Biakinah thu Tha tak tak kan inzirtir a, a tuk thawhTanniah erawh kan thuzir Tha tak takte chu kan theihnghilh leh mai a, kan sumdawnna hmunahte kan Office kalna hmunah leh kan hnathawhna hmunahte kan mize ngai ngaiin kan nung leh a, a thlawna sum dawn lah kan hreh chuang hauh lo a, kan hreh lo mai pawh a ni lo, a thlawna sum dawn theihna tur a nih phawt chuan dawtsawi kan hreh hauh lote hi Krista hnungzuitute tih tur em ni dawn le. Kan politics khelh dante sum leh pai atchilhna nge ram hmasawnna duh vang tihte hi ngaihtuah a ngai ta hial zawk em. Zirlai naupangte, Kohhran mite, sumdawngte leh mitin maiin politics hi kan ngaihven a ngai a, kan ngaihthah ngawt thei lo ang. Nimin lawka a sualna zawng zawng kan phawrhsaka, chil kan chhak khum hial kha tunah pangparThite kan awrh tir leh thei mai a, a lailum Tha chantir leh thei mai khawpa politics-a thil Tha lo pawh kan palzam thei maite hian rah Tha a chhuah hi kei ka ring mawlhlo a ni.
Chung mite chu han belchiang ila Pathianni tuka Biakbuka kan lawipuite tho an ni leh bawk si a, heti taka kan mizo society-a an huangtau ngam a, inthlahrunna an nei chuang hauh lote hi tu thiam loh nge ni ang le. Kan sawi tak New Zealand-ah chuan tlemlai deuhah khan an Foreign Minister chu Thlawhna (International Flight)-ah chuangin ram hla vak loah a zin dawn a, mipui tam ber chuanna Economy class-ah chuang loin Business class-ah a chuang tih an hre chhuak leh a, chutichuan vantlang hriatah auchhuahpui a ni a, inthlan lehah chuan a tla chiang hle a nih kha. Abraham Lincoln-a Tawngkam kan hriat lar tak – Government of the people, by the people, for the people a tihte hi a awmzia hre tharin a takin nunpui ta ila, mipuite hian kan vote khat Theuh hmanga kan thlantlinte hi an diklohnaah chuan huai takin auchhuak ngam ila, mi fello chu hnawl ngam bawk ila he kan zoram hian hma a sawn phah ngei ang le. Krista pawh kha a rawngbawl hun chhung reiloteah pawh khan Biakbuka thil lo zuarte kha an dawhkante a namthluk sak ve bawrh bawrh bawk kha maw……..