Robot-in puzzle cube record siam

Robot tan cube puzzle remdik nan engtia rei nge ngaia i rin? Guinness World Records-in video an share thara chuan second khat pawh tling loah a remdik hman. He robot Japanese company-in an siam hian 3x3x3 cube chu mit khap kar lekin a remdik hman tlat.
Guinness World Record chuan puzzle cube remdik rang ber tiin an tarlang a, second 0.305 chhungin a remdik hman. He robot siamtu hi Component Production Engineer Centre, Mitsubishi Electric Corporation an ni a, record hi Tokyo-ah May ni 21-a a siam kha a ni.
Mihring zinga hetiang 3x3x3 rotating cube puzzle remdik rang ber record siamtu chu China a cheng, Yiheng Wang a ni a, second 4.48 chhungin a remdik hman ve thung.