Chhetri kalbo huna No. 9 luah inpeih Zuala

On Jun 1, 2024 9 0

June ni 6, karleh Ningani mai hi Kolkata khawpuia India-in World Cup qualifier-a Kuwait an mikhual hun leh Blue Tigers captain Sunil Chhetri international football chawlhsan hun a lo ni ta a, he boruakah hian phaitual media lamin Mizo star Lallianzuala Chhangte lam an hawi thup a, Delhi tlangval Chhetri kalbo hnua India hmatawng hraw ber tur inrinsiakna kal mekah ‘next number 9 of the Indian football team’ atan Lunglei tlangval an hual mek a, amah pawhin chu dinhmun luah chu a inpeih!
Talented winger tia an sawi Zuala hian ‘number 9’ dinhmun luah chhoh hi a hreh lo tih India media hmaah pawh sawilang tawhin, Ningania media a hmachhawn tumin, “Tehreng mai, team-in a sir atanga center luah tura min duh phawt chuan ka inpeih thlap e,” a ti.
Kum 27 mi Lunglei tlangval hian Indian Super League final-ah Mumbai FC a chakpui hlimhlawt a, zirna buaipuia Mizoram a rawn chuanchhuah zawk hnuah a chipui patum dangte zawm turin India squad-ah a kir a, Salt Lake Stadium-a Arab team hmachhawn turin a inbuatsaih mek a ni.
Tarlan tawh thin angin, kum 19 zet Indian football-a player pawimawh leh langsar ber pawl a nih chhoh hnuah Chhetri chuan international football a chawlhsan ve dawn ta a, a awm loh hnua India centre forward hmun rawn luah chho turah rilruin ar bo a zawng a, mahse, Chhangte-pa hian ‘striker’ nih a huphurh lo tih media hmaah a sawi.
Zuala chuan, “Ka san zawng leh quality hi number 9 nihna pangngai nen a inrem thlap a, chutih rualin, ka kawng zawh mek leh hmalam hun chu Pathian thutluknaa innghat a ni a, mahse, ramin ‘number 9’ role min bat a nih chuan ka tlanchhe lo ang.
“Kan captain chawl tur hian mi zawng zawng a tilungngai a, a hlawhtlin tawhna leh ram tana a thilpek kan enin kan lawm bawk si a; kan dressing room chuan a ngai hle dawn a, ram tana a tih tawh zawng zawngte pawh kan thlirlet ang a, kan la thlahlel ngawih ngawih dawn a, tu emaw tal chuan a mawhphurhna hi an lakchhawn chu a ngai dawn a ni,” a ti.
AIFF Player of the Year 2023 Lallianzuala Chhangte hian ram tana a inkhelh vawikhatna a thlirlet a, a India debut leh a hnu lam zela Chhetri a chhawr dan leh inrintawkna siamsaktu a nih dan heti hian a sawi:
“A interesting takzet a ni. India tana ka khelh vawikhatnaah khan min ko a, keima duh ang taka game enjoy turin min hrilh a, ani ka khelhpui thei kha ka tan hamthatna a ni a, a ruala ka training session zawng zawng kha ka hlut em em vek a ni,” tiin an captain kalbo tur a fak.
Chhetri hoa Kuwait match khel tur Blue Tigers hian NIlaini khan Bhubaneswar-a an inkulhna national camp atangin Kolkata khua an thlawklut a, karleh match pawimawh atan inbuatsaihna an kalpui mek a ni.
Tarlan tawh thin angin, May thlatir lam khan kum 39 mi ni ve tawh Chhetri hian social media lamah lungchhe angreng taka video post chungin Kuwait match zawh ruala international football chawlhsan ve tawh a tum thu a puang a, a awm loh huna India captain tur chu an awm mai ang a, centre forward thar tur tak hi India-in a baihvai deuh mai thei a, tun dinhmunah Mizoram foward hi a buk a rit deuh ber rih niin a lang.
Indian Super League season liamtaah khan Lianzuala Chhangte hian match 15-ah goal 10 khungin, Indian zinga goal khung hnem ber a ni.
Chhetri lam thlir leh lawk ila, kum 2005 daih tawha Pakistan laka a international debut a nghahchhuah hnu khan Chhetri hian match 150-ah ram tan goal 94 a thun tling tawh a, tun thlenga la inkhel zingah superstar pahnih Cristiano Ronaldo leh Lionel Messi tih loha goal thun hnem pathumna a ni mek.
Kuwait game thlir zui leh ta ila; Lianzuala chuan national squad chhungah mimal chetthat viau aiin teamwork a pawimawh zawk niin a sawi a, “Kan hma hunah hian Chhetri bhai awm loh hunah pawh team kan nihna anga thawhhona tha hi kan innghahna tur a ni,” a ti.
Mizoram forward hian Kolkata mipuite chu a phu ang ngeia Chhetri thlahliam turin a sawm a, “Tun hi Chhetri bhai kan chawimawina hun tur a ni a, he game-ah hian hnehna chang ngei turin player-te pawhin theihtawp kan chhuah ang.
“Chutih rualin history siama World Cup qualifier next round kan luh theihna hun remcang a ni a, chu chu kan dahlen ber pawh a ni a, chumi tihlawhtling tur leh point thum thawkchhuak turin kan engkim kan hlan dawn a ni.
“He match-a kan plus point tur chu nangni, fans hi in ni dawn a, a tam thei ang ber in lo chhuahkhawm ngei kan beisei.
“He game-ah hian kan chak ngei dawn tih tun dinhmunah kan tiam thei lo che u a, mahse, fans tan kan thinlung kan hlan tawh a, he game pawimawh tak hi Chhetri tan pawha hriatreng tlaka chhuah kan duh a ni.
“Kuwait hi team tha tak ni mah se home fans avangin advantage kan nei dawn a; he rama player tha ber berte pawh hman theihin an inpeih tawh,” tiin media hmaah thuchah tawi a hlap!
Igor Stimac-a team hi kumin March thla mai khan an mikhual Afghanistan tihte mai mai lakah 1-2-in a lo mualpho tawh a; match li an khelh tawh atanga point li hum chungin an group-ah pahnihna dinhmun an luah mek a, FIFA World Cup Qualifiers Round 3 chuangkai tur leh AFC Asian Cup Saudi Arabia 2027 khel pha turin an group-ah hian a chhe berah pahnihna an nih hlen a ngai dawn a, chumi tur chuan Kolkata match hi a pawimawh dawn a ni.