Luangmual nulate an thiam ber

Luangmual nulate an thiam ber
Final hautakah set thum set hniha Diakkawn hnehin Luangmual chu hmeichhe title humhim hmasa ber an ni a, Ningani zan khan Ather Pro Volleyball League-ah an champion.
LPS Arena, Falkland-ah set hnih set khata sang zawk an nih hnuah Luangmual an tlahniam a, set hnuhnung berah kirlehin 25-19, 22-25, 25-19, 18-25, 15-12 hnehna an chang.
May ni 30 khan league-ah set thum set hnih thoin Diakkawn lakah Luangmual an chak tawh a, hemi tuma khelh tha bera thlan Lalramliani’n final-ah pawh Kuriz Player of the Match lawmman dawng lehin, point 22 hmuin tum sarih a tisual.
Kum 2023 khan Pro Volleyball-a an tel vawikhatnaah chungnung takin Luangmual an champion nghal a, state dang player Nipa Barad hoin an khelh zawng zawngah an chak vek. Kuminah Mizo hlangin chona khirh an sutlang a, hmeichhe zinga champion zawn hmasa ber leh vawihnih champion thei hmasa ber an ni.
League-ah Serkawn hneh loin an tlawm a, semi-final-ah Bungkawn hnehna’n set nga an mamawh bawk. Luangmual tan season liamta aiin a harsa a, KT Enterprise Best Spiker Rami bakah Lalbiakngheti’n final-ah tum 16 vaw tlain point li a hloh a, Lalhriatpuii’n point 10 a hmuh chanve a tisual.
Luangmual sulhnu chhuiin Pro Volleyball-a an tel hmasak berah Diakkawnin champion nghal an tum ve thung a, mahse, a tawpah tluk an tumte’n dangin uiawm takin an tlawm a, Aizawl pawn atanga champion hmasa ber nih an tumna an tihlawhtling zo lo.
Kolasib team tan Lalmuanpuii’n vawi 18 vaw tlain tum sarih a tisual a, Mizo zinga international player awmchhun Vardingliani’n a hun hnuhnungah point 16 hmuinn 12 a hloh ve thung a; R. Malsawmtluangi’n tum 10 hlap tlain point li a paih.
Pro Division-a season khat an hmannaah Luangmual nen vawithum intawngin Diakkawn an chak lo vek a; nikum December ni 1 khan MVA Cup final-ah set thum faiin an tlawm tawh a, chuti chungin tournament vawihnih an khelhah final an lut ve ve.
An vanglaia Mizo player tha ber ve vea ngaih leh Pro Volleyball-a champion tawh Muani leh Dingi’n Diakkawn team-ah hmun pawimawh an luah laiin, vanglai hmang mek Rami, Biaki leh Hriati hoin Luangmualin hnehna an chang.
Pro Volleyball hmeichhe team chanchina la awm ngai lo thlentirin Luangmualin title an humhim a; Jesse Lalpianpuia’n season a hmanpui vawikhatnaah hlawhtlinna chanpuiin KT Enterprise Best Coach chawimawina a dawng a; KT Enterprise Best Reiceiver-ah langsar loa pawimawh Esther Hmingthansangi thlan a ni bawk.
Diakkawnin an duhthusam ram thleng pha lo deuh mah se season chhia a ni lo a, an rilru natna khuh then turin Lalrinzuali’n KT Enterprise Best Setter chawimawina a dawng a, kut bengin championship an thlahliam bik lo.