Police vote thlak theih loh chhan Mizoram sawrkar niloin ECI mawh – ZPM

State danga MP inthlana duty-a chhuak Mizoram Police-te vote thlak theih loh chhanah Mizoram sawrkar mawh a awm loa, a mawhphurtu ber chu Election Commission of India a ni tih ZPM party chuan an sawi.
ZPM thupuangtu chuan MP inthlanah Mizoram Police 1047, state pawna inthlan duty-a kal ten vote an thlak thei dawn ta lo chu pawi an ti a. Vote an thlak ngei theih nan Mizoram sawrkar chuan hma a lah bakah ZPM Gen. Hqrs. pawhin theihtawp chhuahin ECI-ah lehkha thawnin, vote thlakt ir ngei tura ngenna a siam a. Ngenna hrulah chhuahchhalhna tawngkam pawh thlah hialin, ECI thupuiah vote thlak ngei tura mipui ngenna, tumahin vote an thlak lo tur a ni lo, an tihte pawh tanchhanin, zawhna an zawt a. Mahse ECI hi a sak tlat a, an dilna a hlawhtling zo lo tih a sawi a ni.
Mizorama MP inthlan tur thu hi March 16-a puan niin, March 20-ah gazette notification chhuah a ni a. Nomination tih nghal theih niin, nomination tih theih hun ni hnuhnung ber March 27 a ni a. Nomination paper an endik a, nomination nung atanga inhnuhdawh theih hun hnuhnung ber chu March 30 a ni a; nomination nung, inhnuk dawk lo ho zawng atanga ballot paper chu siam thin a ni, tih te a sawi.
“Inthlan puan a nih tawh chuan model code of conduct puan a nih nghal thin avangin central lam thu thuin kan awm tawh a, state sawrkarin thuneihna a nei tawh lo. Kan police-te state danga duty tura ruatte kha March 28 leh March 29 ah Bairabi Rel Station atanga chhuak tura tih an ni a. New Delhi atangin an chuanna tur rel hi a bika rawn tirh a ni a, tihkhawtkai theih a ni lo. Nomination inhnuhdawh theih ni hnuhnung ber March 30 a ni a. Ballot paper siam hmain Mizoram an chhuahsan hman a ngai a nih chu. Ballot paper awm lo chuan vote a thlak theih si loh a, candidate tur final hriat hmain duty tura an chhuah a ngai tihna a ni,” a ti.
He thil buarchuar angreng tak hi Mizoram sawrkar mawhphurhna a ni lo tih hriat a ngai tih ZPM thupuangtu hian sawiin, “Opposition party lian pahnih pawhin police-te vote an thlak lo tur hi veiin Mizoram sawrkar an dem a, an thahnemngaihna a fakawm hle rualin, a bauh tur dik tak ECI bauh loa, Mizoram sawrkar an bauh daih hi chu a buk thelhin an thelh niin a lang. He thila kan duh tlan theuh chu, kan police duty tura chhuakte hian an chhuah hmain vote thlak fel vek se tih a ni. Mahse ECI inruahman dan hian duhthu a sam zo loa, vote an thlak thei ta lo a, a pawi kan ti takzet a ni,” a ti.