Veng pahnih inkara lehkhabu tawrhna…

Tun hnaia Hlimen leh Melthum inkara inhmuh thiam lohna avanga mipui innawrna karah Melthum library chu a tuartu berah a tang a; library building leh lehkhabu ten an tuar nasa hle a, hei hi a pawi takzet. He thu ziah lai hian library-in mipui kut a tawrh dan hi chiang faka hriat theih ni lo mah se, library hian kutthlak rawn a hlawh deuh nia sawi thawm te pawh a awm a; library tihchhiat duhna rilru kan pu kha inbihchian kan ngai hle tih a hriat theih. Chemtatrawta leh Kaikuang inhmuh thiam loh avanga Kha-ûm zamna Rawpuiin a tuar daih ang deuh kha a ni ber awm e.
Tunhma atang tawhin veng leh veng emaw, khua leh khua emaw inepna boruak ang hi a lo thleng zauh zauh tawh a; tun hnuah hi chuan sawi tur a awm ta meuh lo. Tuna hetiang thil a thleng leh ta mai hi Kristian rama thil thleng atan chuan a inhmeh lo hulhual a ni.
Ram leh ram an han indo nikhua te hian, mihring tana rohlu (heritage) thil, museum, library, monument, etc. hi chu an inzahsakin an inzuahsak hram hram thin zawk a ni ngai a, keini erawh chuan mihring rohlu thil kan dim lo hle a ni.
A thu hrimin, veng leh veng emaw, khua leh khua emaw inep ut ut kan la ching a nih chuan, harhtharna kan mamawh hle tih a lang. Hemi chungchangah hian khawtlang hruaitute, kohhran puithiamte leh sawrkar lama thuneitute hian hetiang thil a thlen tawh lohna tur hi an ngaihtuah a, engmeaw thuthlung hial siam te pawh a tul tawh niin a lang.
William Shaespeare-a play ‘Romeo&Juliet’-a Verona khaw chhunga lal thlah hnam pahnih Capulets leh Montagues te inepna boruak ang kha Aizawl khawpui chhungah hian a thleng ve mai ang tih hlauhawm khawpin veng leh veng inepna boruak hi a thleng ta zauh zauh a, hetiang zel a nih chuan, nakinah intualvuakna hi ngaiah kan la nei mai ang tih a hlauhawm hlel lo a ni.
Mahni awmna veng te hi chu kan tan vek thin; diknaah chuan tan pawh kan tan tur lah ni; mahse, mahni Veng tan kan tihnat dan hi a tharum thawh zawnga kan kalpui duh zel a nih chuan, midang kara remna palaia thawk chhuak tlak pawh kan ni dawn lo tawp tihna a ni.
Khawvel hmun hrang hranga Zohnahthlakte inhuikhawm tuma tan kan lak mek laia ‘Zofate Jerusalem’ tia koh hlawh khawpui bera hetiang thil hi a thleng rup rup thin a nih chuan, kan inhuikhawm hlei thei lovang tih pawh hlauhawm tak a ni.
Social media-in lehkhabu a rûn a, a bawhbet mek a, kaihthawh leh a ngai, tan i la thar leh ang u, tia tha thar thawh tuma tanlak a nih mek laia a library ber kan vaw chhe rem rum duh hi, a lungchhiathlakin a pawi takzet zet a, tun hnuah hetiang thil a thlen nawn tawh lohna turin thuneituten ‘inkohkhawm runpui’ hi huaihawt se a tha awm a sin.