Pathianin tul a tih hunah kan tling leh ang – Zoramthanga

Inthlanah MNF chu Pathianin tul a tih leh an tling leh anga, tul a tih loh leh an tla mai dawn tih an party president Zoramthanga chuan a sawi.
Zirtawpnia MNF office Mizo Hnam Runa inkhawmah Zoramthanga chuan MNF party chu ‘Pathian leh kan ram tan’ titu an nih angin Pathianin kum 63 a lo hruai tawh a, a la hruai zel dawn a, tul a tih leh an tling leh anga, tul a tih loh leh an tla mai dawn tih a sawi. MP inthlan pawh Pathianin a thukru rih a, inpuhmawhna zawng loa Pathian remruata pawm a, Pathianin enge a hrilh a, zirtir a tum tih chhut zawk turin party mite a fuih.
Tun MP inthlana vote tla a that theihna tura mipui zirtir nan sawrkarin cheng nuai 58 chuang a sen laiin, police sang chuang vote thlak thei loa siam an ni leh si chu a vanduaithlak hle tih MNF president hian a sawi a. “Sawrkar inthlahdah vang liau liau a ni,” a ti.
AMC by election atan Search Committee-in uluk taka a zawn hnu ah candidate tha tak leh rintlak tak MNF-in a nei chu lawmawm a tih thu a sawi bawk.
MNF senior vice president Dr R Lalthangliana chuan AMC chu MNF kutchhuak a ni a, State Information Commission pawh hmarchhaka a hmasa ber turin kum 2007 chhoa MNF din a ni tih a sawi. AMC by election atan candidate tha tak an nei a; an corporator-te leh general headquarters lamin theihtawp an chhuahpui dawn tih a sawi.
MP inthlanah tum dang ang lo taka opposition party-te tangrual loa a mala an ding chungin, Congress nen an vote share belhkhwm chuan vote sing thum chuangin ZPM candidate an khum tih a sawi a ni.