BJP thlawp candidate tlin loh chhanah inngai

Manipur-ah Lok Sabha bial pahnih a awm a, inner Manipur leh outer Manipur an ti. Outer Manipur hi Zo hnahthlakte awmna a ni a, he bialah hian NPF candidate chu BJP-in an thlawp. Mahse a tling lo a, hei hi Zo hnahthlakte’n an vote loh vangah an ngai.
Manipur-ah hian BJP an sorkar a, mahse tun tum Lok Sabha inthlanah khan inner Manipur-ah BJP candidate a tlin loh bakah outer Manipur-ah pawh BJP thlawp a tling lo.
Outer Manipur-ah hian Naga People’s Front (NPF) candidate chu BJP-in an thlawp a, he biala Zo hnahthlakte chuan BJP thlawp hi an vote lo mai ni lovin BJP nena tang dun lo tur vote turin an inngen a ni.
Manipur-a Zo hnahthlakte ram Churachandpur district-a Zo hnahthlak hruaitute’n Congress candidate vote turin mipui an ngen a, hei hi BJP thlawp NPF candidate tlin loh chhan leh Congress candidate a tlin chhanah Zo hnahthlakte chuan an ngai.
Zo hnahthlakte zingah hian a tirah chuan NOTA hmeh mai te pawh rawt an awm a, mahse Congress candidate vote turin an inngen ta a ni. Churachandpur district-ah hian Congress candidate hian vote pawh a hmu tha.
Zo hnahthlakte awmna hmun dang Kangpokpi district-ah chuan vote tur an inhrilh lo a, mahse BJP lamtang chu vote lo turah ngaih an ni.
Manipur-ah hian nikum atangin Zo hnahthlakte leh Meitei an inbei a, he an inbeihnaah hian Manipur sorkar chu Meitei lamtangah mai pawh ni lovin anmahni beitu-ah hial an ngai. Hei vang hian sorkarna siamtu party hi vote loh ni se an ti a ni. A tirah chuan inthlan hi boycott ni se tih ngaihdan te a awm a, boycott lova NOTA vote vek ni se tih ngaihdan te pawh a awm.
Churachandpur MLA bialah voter 64890 an awm a, vote hi 63.49% a tla.. Congress candidate vote tura an inngenna hi zaah za chuan a hlawhtlin an ring lo a, mahse 80% vel chuan Congress candidate an vote an ring.
Zo hnahthlak te, Naga te, Meitei leh hnam dang awmna outer Manipur-ah candidate pali- Naga People’s Front (NPF) leh Congress candidate leh independent ticket-a ding pahnih an awm.tawh