Kawng then chak loh vangin maxi cab lam hnatlang dawn

Hmartlangdunga Maxi Cab Welfare chuan naktuk – June 18 hian Mualmam daia leimin, lirthei thahnem tak tan thin na chu thianfai turin hnatlang an ko.
Hmartlangdunga lama Maxi Cab Welfare – Tuivawl Maxi Cab, Tuisualral Maxi Cab, Rungdil Maxi Cab Welfare thukhawm chuan Mualmam daia leimin avanga hun rei tak khualzin phur maxi cab an tan thinna chu thenfai an rel a. Thawhlehni chawhma dar 10.00 ah hna tan an tum a ni. Mualmam leiminna hmun paltlang turte chuan hnatlangte tibuai lo zawnga hun ruahman lawk turin an ngen.
Maxi Cab Welfare ho thuchhuah intawm siamah, Hmartlangdung kawng, an chak lakna leh zin veivahna ber thenfaina lam a chak tawk lo chu pawi an tih thu an sawi a. Mipui zin veivakte thlamuang taka an zin theihna a nih beiseiin hnatlang hi an rawt tih an sawi.
Thudawn danin, Mualmam leimin hi Aizawl atanga km.46 vela hla, Sesawng pelh lawk a ni a. Cyclone Remal siperin a kentel ruahsur avanga lei hi min a ni. Kawngchhak atanga minin metre 20 vel kawng a hnawh a, PWD-in excavator nen thenfai hna thawk tawh mah se, an hna a muan avangin an zo hleithei lo. Lei paihtu lirtheiten kawngah leivung an thlauh tel avangin kawngpui dung a ti nal a, hei hian harsatna a thlen belh bawk. Bungraw phur lirthei liante chu zan riah phah chang an nei tam a, kawng nal avang keia kal pawh a ti harsa a, lirthei lianin harsatna an tawk nasa zual tih sawi a ni. Hmartlangdunga maxi cab neitu intelkhawm chuan chak zawka kawng thenfai hna thawh a nih theih nan lirthei service loa thawhchhuah an rel ta a ni.