Sawhthing leh Research Base

Nimin khan chief minister hovin sawhthing lei, hralh leh a processing chungchang chu a kaihhnawih minister leh official-ten an sawiho a. Sawhthing hralh theih bak a grade hniam, process ngai chi lo awm ta se, engtia kalpui tur nge ni ang tih an sawiho a; private company thawhpui dan tur te an rel bawk a.
Tuna sawrkarna chelh mek party hian election campaign lai khan kuthnathawktute dawmkan an tum dan chiang takin an sawi a, ‘a rate hre sain kuthnathawktuten hna an thawk ve tawh ang a, thlai thar leina tur sum pawh budget-ah kan dah ang’ an ti a. An sawi uar em em pakhat chu, ‘keini party chuan kan ti mai mai dawn lo, engkim mai hi research based-in kan kalpui’ tih kha a ni.
An sawrkar hnu lawkah – hmarcha, aieng, sawhthing leh hmunphiah atana minimum support price siam a nih thu te, kuhva chingtute harsatna sutkian dan turte pawh an sawi a, hma an la mek a, kuthnathawktute harsatna pawh sutkian a nih theih ngei ring ila.
Research base han tih hian, a huam zau ang reng hle a, sawhthing chungchang research an kalpui dan kha chipchiarin mipui lam chuan hriatpui pha lo mah ila, nimina chief minister hova sawihonaah, ‘process ngai chi lo awm ta se, engtia kalpui tur nge ni ang’ tia rel a la ngai leih leih chauh tihna a nih hmel a. Research an kalpui lai khan, tuna harsatna thleng thei tur ang hi a pawimawh teh lul nen, ‘exploratory research’ leh ‘constructive research’ a tel chiah lo nge, a thara rel chawp a ngai zel dawn a nih chuan, sawrkar hmasa ten ‘kan ngaihtuah mek’ tia term an hmang ral thin ang mai kha an ni ve palh mai ang tih pawh a hlauhawm hlel lo a ni.
Sawhthing hi kan buaipuina a rei ta hle a, UT hlim atanga tun thleng mai hian election campagn auhlaah kan la hmang ta zel a. Sawrkar kal tawhte pawh khan eng eng emaw chu hmalakna an han kalpui ve a, a zuzi ral leh thuai thin. Kha kha a chhan ber nia lang ta chu, election campaign auhlaa an lo hman a nih tawh vanga a hming chauha hmalakna kalpui, hnemhnanpui tham tur law lawa ngaihtuahna seng zui si lo a nih vangah puh a nuam ta ber awm e.
Sawhthing chinna ram leilung hi a hnuah thlai dang chin nana hman tlak tawh loh angin sawhthing chingtute ngei ngei pawh hian an sawi thin a, buh chinna thingtlang lo neihna aiin ram a bua rei zawk niin an sawi.
Chuti a nih chuan, rei tak han kalpui chi niin a lang lo a, tun hun hi hma lam hun thui tak thlir chunga beng sika ngaihtuahna sen hun lai tak a nih a rinawm; ‘research based’ kan ti ta sa sa.