H Lalchhuanliana
-- Advertisement --
Mihring famkim ta lo chu tumah hi sawisel bo kan awm lo va, famkim bik lo khan famkim lo dang kha kan va sawisel thin a, chu chu mihring mizia a ni. Insawiselna hian kan inthenawm khawvennaah leh kan society-ah a tha lo zawnga nghawng a neih avangin chin tawk hriat a pawimawh khawp mai. Kan mi rin zawng tak leh ngaihsan zawng takte thusawi phei chu a dik ngei turah ngai sain finfiah kher lovin kan awih nghal mai thin a. Politics-ah phei chuan kan party hruaitute sawi a nih tawh chuan a dik a dawk thlu lovin thih ngamin kan tan mai thin a, party dang thusawi phei chu dik lo tur chanin kan changa, kan sawisel nghal mai thin a ni.
Nikum 2023 MLA inthlan dawn leh kumin MP inthlan dawn thleng khan mimal insawiselna lam hriat tur a la tam hle mai a, kawngro erawh a su lutuk lo tan ta niin a lang. Thu belh chian dawl lo leh rintlak loh thlenga mimal beihna hi Social media lam thleng hian hriat tur a tam thin hle a, case nei pawh an tam sawt hle a ni. Khawvel changkang zelah kan Police lam pawhin hmanrua an nei changkang ve zel a, Fake account hmanga thu dik lo leh invauna lam thlenga thu chhuah pawh an chhui chhuak zung zung zel tawh a ni. Social media hman thiam a pawimawh thu hi kan inzirtir reng chung hian thil dik lo tihnan kan hmang nasa em em a, election dawna vote leina pawisa inthawnnan (gpay) thlengin kan hmang ta zel a ni.
Politics-ah chuan midang sawisel leh mahni lam insawimawi hi vote zawnna chi khat chu a niin hnam changkang zawkte pawh an bang bik lo a ni. Mahse insawiselna hi awmze nei leh rintlak, belhchian dawl a nih loh chuan, hun rei lo te hnuah a sawiseltute a vaw let fo thin a, inhmelhuatna hial a thlen thei a ni.
Kan ramah hian midang sawisel thiam apiangte hi politician tha emaw kan ti rei ta hle mai a, a zialo hle a ni. Tun hnaiah hian thangthar an harha, khawvel thiamna sang zel hmangin thudik leh dawt a hriat zung zung theih tak avang hian, khatiang ang tactic thing lutuk hmang politician-te kha kan hnawl tan ta mek a, a lawmawm hle a ni. Mi thenkhat khatiang tactic hlui bak hman tur hre lo politiciante pawh hian thawhrimna leh dikna hmanga ram hruai tum a hun tawh a, a nih loh chuan lo awl tawh mai teh u! Ram hmangaihtu tak tak tan chuan mi dem leh an fel lohna atanga din chhuah tum ai chuan, dikna leh thawhrimna atanga ram siam hna thawh hi a kawng tur a ni zawk ang. thatnaa sual hneh tura zirtir kan nih ang ngei hian, kan insawisel thin a nih pawhin midangte thatna tur zawng ni thei se la,chin tawk hriat a tha hle mai.
Belhchian dawl lova mimal insawisel hian kawngro a su hran lo tih chu kan inthlan hnuhnung ber pahnih atang ngawt pawh hian sawi tur a tam awm e. Entirna pakhat chauh han sawi ila:- Pu Richard Vanlalhmangaiha, kan MP thlan thar tak hi candidate a nih lai khan nasa taka sawisel a tawk a. Criminal case neia puh a ni a, case a neih loh thu leh an puhna case-ah khan thuhretua (prosecution witness) a tan thu te, kha case kha a tawp tawhin thil sual titute an tang (convict) mek tih thu thlenga sawi fiah a ni chungin case nei anga puh ngar ngar pawl an awm a nih kha. Kha thu theh darh khan mipui tam tak rilru pawh a tichiaia ngaiin, amah tantute pawhin a tlin loh mai an hlauh phah hial niin an sawi. Mahse hneh taka thlan tlin a ni khan Pu Richarda insawifiahna kha mipuiin an pawma, thu belhchian dawl lova puhna kha mipuiin an hnawl zawk tihna a ni ang. Midangte chhiatna atanga din chhuah tumna hi rilru thianghlim a ni ngai lo va, ram hmangaihtu tih tur a ni lovin a malsawm ngai hek lo vang. Kan sawisel thin turte chu – ram roreltu tlak lo khawpa nungchang inthlahdahte, mi rinawm lo leh eiruk chingte leh dawt sawi chingte hi ni zawk se, chutiang mite chu party sawi lova kan hnawl ngat chuan kan tha mai ang.
Sawisel suh u, sawisela in awm lohnan, in sawisel ang bawkin an sawisel ang che u…tih Bible-a kan hmuh hian mihring famkim leh sawisel bo kan awm lohzia a sawina niin a lang a. Insawisel ngawt thin ai chuan induhsak taka thurawn inpek hi kalpui thei ila, chu chu a zahawm ang a, kan sakhuana nen pawh a inhmehin rah tha pawh a chhuah zawk ngei ang.