Imphal-ah COCOMI ten rally nei

Manipur-a chi leh chi, hnam leh hnam kara buaina thleng mekah Coordination Committee on Manipur Integrity te chuan July 28 khan Imphal West-a Thau Ground ah mass rally an huaihawt a. State integrity chu humhim tlat ni se tiin Kuki-Zo group te laka Suspension of Operations chu tihtawp an ngiat bawk a, thleibik nei taka combing operation neih te pawh tihtawp an ngiat bawk.
He rally hi Kuki-Zo community tena seperate administration an ngiat chhanletna anga ngaih a ni a. Imphal West Independent MLA Nishikanta Singh Sapam pawh rally ah hian telin, “Independent MLA ka ni a, mahse, Manipuri a hmasa ber a, chuvangin kan mite thlawpin rally hi ka zawm a ni” tiin a sawi.
Th. Comorendro, Coordinator of COCOMI, Imphal vally a CSOs influential ber pakhat ni bawk chuan, “He rally hi Manipur integrity humhim nan leh Government of India-in min then darh lohna tura kan huaihawt a ni,” tiin a sawi.
Sapam chuan Manipur mipui te chuan State thendarh chu an duh bau dawn lo tia sawiin State boundary thenhran chu pawm theih a ni dawn lo tiin a sawi bawk a.
“Mipuite hian sorkar berin humhim thei lova inhriain mahni inhumhim tulah an ngai a ni. Hetih karah hian valley bikah ralthuamte zawngin combing operation neih a ni a, tlangramah neih a ni ve lo” tiin Sapam chuan a sawi bawk.
Manipuri tena rally an neih hma niah Kuki-Zo community te chuan Hill district-ah rally puitham tak neiin Union government chu an mite tana seperate administration pe vat turin an ngiat ve thung.
Home Minister Amit Shah hnena Kuki-Zo community tena memoranda an thehluhah Article 239A of the Constitution of India hnuaiah Union Territory leh legislature pe turin an ngiat a ni.
June 28 khan Meira Paiba group hrang hrang a bul hnai Moirang leh Bishnupur district a mi te pawhin Imphal rally hi women’s civilian group te nen an zawm ve bawk a. Students group te chuan “justice” ngiatin “Manipur atanga Kuki narco-terrorist-te nuai bo” an ngiat bawk.