School chawlh thu puang tlai
July 2-a Mizoram sawrkarin khawchhiat avanga school chawlh tur thu a puan hun chu a tlai deuh avangin zirlai tam zawkin school an thleng hman.
India Meteorological Department, Regional Meteorological Centre Guwahati leh Meteorological Centre Aizawl chuan, Assam leh a chhehvela fur ruah a thawh rualin Mizoram hmun thenkhat, a bikin Mamit, Kolasib, Lawngtlai leh Siaha district-ah ruah nasa tak sur thei dinhmunah a ding a, Lunglei leh Hnahthial district-ah phei chuan a sur nasa zual thei tih an sawi. Mizoram hmun thenkhatah thlipui leh ruah thawk thei a nih bakah tek nasa tak tla thei a ni tih July 1 khan thuchhuah a lo siam tawh a. Chhiatna laka mipui kan him theih nan chhungtinte a theih ang anga fimkhur lehzual turin an ngen a ni.
July 1 atang khan Aizawl leh Mizoram hmun dangah ruah a sur a, nileng leh zan lam thlengin a sur a ni. July 2 zingah pawh a la sur chhunzawm bawk.
July 2 hian School Education department chuan ruahsur nasa avanga Disaster Management & Rehabilitation department atanga thurawn hmuh angin, school chawlha puan a ni tih thu a chhuah a. He thu a darh hi zing dar 8.00 hnulam niin, sawrkar thupuangtu ber – Information & Public Relations department kaltlang loin, a tam zawk chuan social media-a darh an hmuh atangin an hria tih thu dawn a ni.
The Aizawl Post thudawn danin, Education department lama hotute leh an lamhnai lam chuan school chawlh puan tur thu hi zing dar 8 hma in an hre nual tawh a, hemi ang hian an tu leh fate school kal lo hrim hrim pawh an awm nual tih sawi a ni. A tam zawk erawh chuan school an pan lai mek leh an thlen hnu ah school chawlh hi an hre chauh a, school thuneitute leh zirtirtu pawh an bang bik lo.
School thenkhat chuan zirlai an thlen kim hnu ah chawlh tir zui mah se, a tam zawk – a bikin middle school chin chunglam chu ni chanve (half day) angin school an kal hlawm nia sawi a ni a. School chawlh thu hriat hma avanga an fate school-a hruai lo, school neitute lamin kal leh tura an tih avanga insiam tha leha school panpui leh ta pawh an awm tih sawi a ni.