Lungleiah ruihhlo do kalpui duh danah an inrawnkhawm

Sawrkarin ruihhlo do beihpui a thlak mekah a kaihhnawih minister leh sawrkar department bakah kohhran leh tlawmngai pawl aiawh chu Thawhtanni khan Lungleiah Home minister K Sapdanga kaihhruaiin an inrawnkhawm.
Excise & Narcotics minister Lalnghinglova Hmar chuan sawrkar hotute, tlawmngai pawl leh kohhran hruaitute nena ruihhlo do meeting neih a tul chhan sawiin, “Lunglei district-ah hian engti angin nge sawrkarin ruihhlo do kalpui se, tia kohhran leh tlawmngai pawlten beiseina in neih tih sawrkar chuan hriat a duh bakah in thurawn ngaihthlak a duh a ni,” a ti.
Sawrkar chuan theitawp chhuahin ruihhlo a do mek a, kohhran leh tlawmngai pawl pawhin ruihhlo do kawngah chak takin hma a lak reng avangin lawmawm a tih thu a sawi a. Ruihlho donaa hmalakna hrang hrang inhrilhhriat tawn a tul tih a sawi bawk.
Social Walfare minister Lalrinpuii chuan ruihhlo drug policy duan mek a ni tih a sawi a. Ruihhlo dona atan state sawrkarin cheng vaibelchhe 3 a sanction a, Lunglei-ah pawh nuai 7 pek niin, Social Welfare department-in master trainer 40 a neih chu kohhran leh tlawmngai pawlten an hmang tangkai hle tih a sawi a ni.
Lunglei atangin mi 50 training pek leh tum niin, chu chu tangkai taka hman a nih theih a rin thu a sawi a. Ministry of Social Justice hnuaiah awareness leh training neih nan kumtin sum a lokal thin a, district len dan azirin sem thin a ni tih minister hian a sawi. Mizoram pumah De-Addiction Centre 50 awmin, Ministry of Social Justice and Empowerment hnuaia enkawl 10, private enkawl 40 a ni.
Supply minister B Lalchhanzova chuan naupang ngaihsaktu nei lo an awm chu a pawi a, nu leh pa leh fate inkar zau ta lutuk chu ruihhlo ti an tam chhan nia a hriat thu a sawi. “Nu leh pa leh naupangte inkawmngeih hian ruihhlo do kawngah kawngro thui tak a sut ngei a rinawm a. Naupangte hian an chenna in nuam an ti em, nuam an tih theih nan engtia hma lak tur nge tih inzawh fo a tul a ni,” a ti.
Inrawnkhawmah hian Sub-Hqrs YMA Lunglei hruaitute, kohhran hrang hrang hruaitute, MHIP, Police, Excise & Narcotics leh district administration aiawhte chuan ruihhlo do kawng hma an lak tawhna leh harsatna an tawh an sawi a. Sawrkar tha tichak tur leh puibawm turin an inpeih reng tih an sawi a ni.