VCP-te RTI dan sawipui

Mizoram State Information Commission-a state information commissioner Mangjangam Touthang chuan Thenzawla village council pali – Kanan Veng, Thenzawl East, Thenzawl West leh Thenzawl Vengthar VCP theuhte chu Ningani khan kawmin, Right to Information Act chungchanga VC leh mipui hriat tur pawimawh an inhrilh.
Information commissioner chuan, sawrkarin VCP zawng zawng chu state public information officer (SPIO) atan a ruat tawh a. Local council chairman pawh SPIO-a ruat an ni a, an huamchhunga sawrkar hnathawh hrang hrang mipuiin hriat duh an neihte an zawt thei a, chu chu ni 30 chhungin chhanna an pe tur a ni a, chhanna an pe thei lo a nih chuan Departmental Appealate Authority hnenah an zualko thei tih a sawi. Zawhna zawttute hi channa an dawnah an lungawi lo a nih chuan MSIC-ah ziakin emaw Mizoram RTI online hmangin an zualko thei a, hei hi MSIC chuan lo enpuiin, thutawp a siam thin tih a sawi a ni.
Mipuiin hetianga chanvo an neih hi duh angin an la hre tha tawk loa, an la hmang tangkai tawk lo nia a hriat thu Mangjangam Touthang hian sawiin, tangkai takin hmang se an duh tih a sawi. VCP-te pawh mipui hriat duh hrilh thei turin inbuatsaih tha turin a chah.