CM-in thudik tawk lo a sawi ngam – Lal Thanzara

Chief minister Lalduhoma chuan thudik tawk lo sawiin, remna leh muanna awm theihna atan MP a nihna kalsan angin a insawi tih Congress president Lal Thanzara chuan a sawi.
Zirtawpnia Congress Bhavan-a inkhawmah Lal Thanzara chuan MZP-in Remna Ni lawmna an huaihawt tumin chief minister hian thudik tawk lo a sawi nia sawiin, “Thudik leh dik lo hrechiangtu a ni chung a, khatianga a sawi duh kha a hah awm mange ka ti. Anti Defection Law hmanga MP atanga ban hmasak ber emaw ka lo tia, remna leh muanna avanga bang a ni lo reng mai! Thil dik ziktluak lo a sawi duh kha a lainatawm,” a ti.
ZPM party-ah mithiam tak tak, thil hre thuk tak tak an awm ve anga, chu’ngte chuan engtin nge an ngaih ang, tia sawiin, “He sawrkar hian lehkhathiam tak tak, mithiam tak tak adviser, celeb’ leh consultant an nei a, chuti chunga an kal fuh thei lo hi BJP hluihlawn thil an lo la em ni ang tih ka ngaihtuah. Hetiang zela an kal chuan ‘ennawm mak tak’ kan la hmu in ka ring,” a ti.
ZPM-in an sawrkar huna an tih ve loh tur an sawiah, contractor chauhin contract hna thawh, restricted tender tih ve loh, VIP culture tihbo, kuhva ro dan loa tawlh thla khat chhunga tihbo, sum puk ve loh, tih te a ni a; sawi loh ang hlirin an ti niin MPCC president hian a sawi. “Chanchinbua kan hmuh ang khan, kuhva ro tawlhruk bag 9000 chuang Vairengte leh a chhevela awm, thuneitute nen lasawn lo tura inremna awm chu a rukin bag 5000 chuang lakbo a ni. Thuneitute hriatpui lo chuan a lakbo theih loh ang tih a rinawm,” a ti.
Austerity measures an lak dan tur an sawi laiin, MLA Fund an tipung a, Board chairman hlawh an tipung a, councillor hlawh an tipung a, advisor an tipung a, anmahni enkawl nan sum tamtak an hmang mek tih a sawi bawk.
Bangladesh leh Burma border-a buaina awm mekah Burma nena kan insumdawn tawnna chu Assam Rifles-in gate an kalh a. Hawn tir leh tawh anga an insawi chu thu diklo niin, gate te zawk chauh an hawn avangin mi tamtakin harsatna an tawk tih Congress hruaitu hian sawiin, border trade hi hawn leh a nih thuai theih nan hma la turin a duh tih a sawi. Bangladesh atanga rawn raltlan, nunaute chu BSF-in Bangladesh lama an hnawtkir leh thin chu state sawrkarin BSF hnenah dang tawh lo tura thu pe turin a duh tih a sawi bawk.
Enchhin sawrkarah mipui an beidawng tan a, anmahni thlaktu tur arbo an zawng mek a. MNF lam an en a, an hotupa ber enin beisei an nei thei tawh loa, thutiama ding thin leh kuthnathawktute dawmkan hna lo thawk tawhtu Congress an thlir mek tih a sawi.