CM-in PM leh minister dang kawm

Chief minister Lalduhoma chu New Delhi-ah sawrkar laipui hotute dawrin a kal a. Prime minister bakah Union minister dangte a kawm.
Inrinni khan Prime minister Narendra Modi chu a chenna inah a hmu a. Assam Rifles sawn chhuah chungchang, Mizoram sawrkar Handholding Policy chungchang bakah Bangladesh atanga lo lut Zohnahthlak Bawm unaute dinhmun a sawipui. Chief minister hian Bawm unaute Bangladesh atanga himna zawnga Mizorama rawn luh tumte chu a thawnkir theih loh thu Prime minister hnenah hian a sawi a ni.
Inrinni vek khan Minority Affairs leh Parliamentary Affairs minister Kiren Rijiju a hmu bawk a. Central scheme – PMJVK hnuaia Mizoramin project 65 a neih zinga hmanhmawh thlak zual 29 chu tihhlawhtlinsak thuai a lo tiam a, a bak project 36 pawh bawhzui thuam a tum dawn tih Lalduhoma hi a lo hrilh a ni.
Pathianni khan Defence minister Rajnath Singh chu a chenna inah a hmu a. Mizo Scouts Battalion din chungchang, Assam Rifles sawnchhuah chungchang, Lengpui Airport bakah Mizoram hmasawnna tur thil pawimawh dang a sawipui
Minister of State for Fisheries, Animal Husbandry and Dairying George Kurian pawh a chenna inah a hmu a. African Swine Fever (ASF) hrileng vanga Mizoram harsatna tawh mek leh tanpuina mamawh dan a sawipui bakah sangha khawi lama Mizoram tihhmasawn dan tura a ruahmanna (project) a thehlut bawk.
Chief minister hian Prime minister leh minister dang a hmuhte hi Mizo thar thei leh chawhmeh – sapthei, Dragon fruit, balhla leh mautuai a pe a. Prime minister sapthei hi a lo la hmu ngai loa, a ei dan tur thlengin a zawt a ni. Heng thei hrang hrang hi kuthnathawktute dinhmun leh Mizoram economy tihhmasawnna tura pawimawh tak a nih theih thu chief minister hian a sawi a ni.