Sihhmui lei dawh 81.21% zo tawh

Lengpui Airport panna, National Highway 44A/108 ni bawk, Sihhmui lei – steel arch (semi through) dawh hna chu zaa 81.21 vel zo tawh anga ngaih a ni a, kuminah August-ah chuan zawh hman tum a ni.
Sihhmui lei dawh mek hi Inrinni khan PWD minister Vanlalhlana chuan a hmunah a enfiah a. Mizoram tana inkalpawhna pawimawh a nih angin, zinmite leh he kawng paltlang khaw mipuiin harsatna an tawh loh nan lei dawh hna chu rintlak tak leh a hun taka zawh tum turin thawktute a chah. Lei dawh endiknaah hian PWD hotute bakah contractor lamin an lo dawngsawng a ni.
Poddar Infractech Pvt. Ltd. Delhi-in lei dawh hna hi a thawk a. 2021 March 27 atang khan thawh tan niin, kum hnih chhunga zawh hman tura ruat a ni. Hrileng leh harsatna hrang hrang avangin a hun takah peihfel hman a ni ta lo a ni.
Tunah lei dawh hna hi zaa 81.21 vel zo tawh anga chhinchhiah a ni a, lei hi remkhawm fel a nih hunah luidungah hian pawh kai tur a ni ang. Kumin August-a zawhfel hman beisei a ni tih thawktute hian an sawi. Lei dawh zawh hian kawng siamthat leh a ngaih dawn avangin October 2024 chhungin lirthei tlan theia buatsaih hman beisei a ni tih an sawi bawk.