MSPMC-in building sak mek endik

Mizoram State Project Monitoring Committee (MSPMC) Team ‘B’ chuan July 5 khan Zoram Medical College Falkawna khum 82 awmna Girls Residential Hostel leh khum 60 awmna Intern Hostel sak mek an endik.
Girls Residential Hostel leh Intern Hostel sakna atana sum ruahman hi cheng vaibelchhe 10 ve ve a ni a, hna hi zaa 94 zawh tawh a ni. Hostel-te hi duanlawk sa anga sak a ni em, tih an endik a. Siamthat ngai leh hmalakna tur point hrang hrang chu department hotute leh contractor-te nen an sawiho nghal a ni.
MSPMC Team hian Kelsiha ‘Ropuiliani Freedom Fighter Museum’ sak mek an endik bawk a. Kumin May 8 khan hnathawh dan hi an lo endik tawh a, a hna tha lo lai siamthat dan tur rawtna MSPMC General Body meeting-a an rel hnu ah nodal department, Social Welfare & Tribal Affairs leh contractor-te hnenah rawtna engemawzat an thlen leh tawh. Heng rawtna an thlen leh hmalakna tur an ruahman anga bawhzui a ni em tih, tun tumah hian an en a ni. Museum hi ruahman ang taka a puitlin a, tangkai taka chhawr a nih theihnan vil chhunzawm zel an tum a ni.
Heng hmun pahnih an tlawhnaah hian a kaihhnawih sawrkar department hotute leh contractor-ten an lo dawngsawng a ni.