MHIP leh chhungkua

Mizo Hmeichhe Insuihkhawm Pawl (MHIP) din champha vawi 50-na Golden Jubilee puala MHIP Gen. Hqrs. president thuchahah khan, ualau taka sex hman leh a kaihhnawih thehdarhna social media platform-a titawp tura MHIP-in a beih thu a tel a.
MHIP hian hmeichhiate hamthatna tur thilah leh, kawng hrang hrangah Mizoram hmasawnna atan nasa takin hma a lain hna a thawk thin tih chu tlanghriat a ni awm e. An hnathawh leh an hmalaknate hi a chhuanawmin ram leh hnam hmasawnna pawimawh tak tak a tling a ni.
Hetih lai hian, a pawl anga an buaipui thin thenkhat hi chu, chhungkua inenkawl dan azira lo awm thin a ni tih hi a hrechiang tur ber chu chhungkaw nu ber, MHIP member-te hi an nih a rinawm. Tun laia ualau taka sex leh a kaihhnawih pholang thinte hi, an tet lai atanga hetiang thil tha lo tih duhna thinlung pu sa an ni vek dawn lo tih a chiang a. Eng vanga hetianga thil tha lo leh mualphothlak tak hi ti duh ta mai nge an nih tih zawhna chhanna chu, ‘chhungkua inenkawlna azir a ni’ a tih theih awm e.
Thil reng reng hi a tobul atanga a fuh tawh chuan a ler lam a chhe tak tak thei lo; chutiang bawkin a tobul atanga a dik tawh loh chuan a ler lam a tha tak tak thei tawh lo bawk. Tuna thalai tam tak, chin tha lo hrang hrang ching mekte hi, an thil tih hi an pianpui a ni lo tih a hrechiang bertu chu MHIP member, a bikin Nuho hi an ni ngei ang.
A zawng a zain fate diklohna leh awm khawlohna thilah chhungkaw nu ber mawhpuh ngawr ngawr chu thil dik a ni kher lovang, chutih rualin chhungkaw inenkawlnaah hian nu ber mawhphurhna sanzia erawh a hriat mai awm e.
Hei hi a nih avangin, MHIP hian chhungkua atanga bul tan that kawngah, tun atang hian beihpui thlak chho leh se, chu chu kum sawmnga lai an lo tlin tak hminga beihpui thlaknaah ngai sela, a ler lama thuai nghek nghek ai chuan a sawt zawkin a rinawm. A ler lama thuai vak vak sia a tobul lam siam that tumna a awm leh vak si loh chuan, hmalakna thawm na tak, mahse thawk na thei mang lo a ni reng mai ang tih a hlauhawm a ni.