Mangtha Toni Kroos

Euro 2024-ah Spain hneh lova Germany an tlak vangin footballer ropui Toni Kroos chuan football a chawlhsan zui nghal a. Ball thiam leh fing, ze zawi ruih mai mi thenkhatin ‘The Roger Federer of football’ an tih hial Toni Kroos chu ‘mangtha’ tia thlah a lo ngai ta.
Khawvelin midfielder ropui tia a hriat reng tawh tu Toni Kroos hi January ni 4, 1990 khan Greifswald, East Germany-ah a piang. Kum 1997 khan an tualchhung club Greifswalder SC rawlthar team tan a khel tan. Rawlthar a nih lai hian Hansa Rostock leh Bayern Munich tan a khel. Kum 2007 atangin Bayern Munich senior team tan a khel tan. German club lian Bayern Munich atangin a hming a chher a, Bundesliga leh UEFA champions league-ah te a champion pui.
Midfielder tha tak ni bawk mah se Bayern Munich hian Mario Gotze nen hlawh inzat pek an hreh teh tlat a, chhuahtir an pawiti lo. Bayern Munich in an hralh phal tih an hriat vangin club hrang hrangin lak tumin an ngaihven nghal. EPL club lian Manchester United in an la teuh hman viau. United in Kroos lak luh tumtu David Moyes bana Louis van Gaal an rawih tak vangin an indawrna a tlawlh. United nen an indawrna a tlawlh hnuin Real Madrid an lo lang a, khawvela football club hausa leh hlawhtling ber Real Madrid hian €30 million vel bawr lekin kum 2014 khan an la lut a. An lak fuh zia chu sawi chiam ngai lovin football khawvel hian a hria.
Real Madrid a zawm hnuin Toni Kroos hi a vul zui ta viau, Real Madrid hi Champions League-ah vawi nga a champion pui a. Bayern Munich-a a awm laiin UCL-ah an lo champion tawh bawk nen footballer zingah UCL-a vawi ruk champion thei awmchhun a ni. Real Madrid tan hian inelna hrang hrangah vawi 465 a khel a, goal 28 a thun. Los Blanco hi La Liga-ah vawi li a champion pui bakah FIFA Club World Cup-ah vawi nga a champion pui bawk.
Germany player ropui zinga chhiar tel reng tawh tur Toni Kroos hian kum 2011 atangin ram tan a khel tan a. Germany tan hian inelna hrang hrangah vawi 114 khelin goal 17 a thun. Kum 2014 khan World Cup-ah a champion pui. Covid 19 hripui vanga Euro 2020, chu kum 2021 khan khelh a ni. Euro 2020 atanga Germany an tlak hnuin Kroos hian ram tan inkhelh a chawlhsan zui nghal. Hun rei tak a chawlh hnuin Germany a khelh tur Euro 2024-ah ram aiawh turin a kir leh. Club tan inkhelh a chawlhsan hnuin Germany tan a inlan a, July ni 4, Zirtawp zanah Spain an hneh loh hnuin Kroos hian football a chawlhsan zui ta a ni.
Kroos hian football a khelh chhungin club leh ram tan vawi 845 zet a khel a, goal 84 a thun. Football khawvelah player anga hun a hman chhungin trophy vawi 33 zet a la a, hlawhtlinna sang tak nen a ropuina football a chawlhsan a. Football khawvelin midfielder ropui Toni Kroos a mangtha ta a ni.